आफ्नै उम्मेदवारलाई हराउन निष्कृष्ट र अक्षम्य अपराध गर्नेहरुसँग एकता हुँदैन: इश्वर पोख्रेल

६ जेठ, काठमाडौं । नेकपा एमालेका महासचिव एवम् उपप्रधानमन्त्री इश्वर पोख्रेलले आफ्नै पार्टीका उम्मेदवारलाई हराउन निष्कृष्ट र अक्षम्य अपराध गर्नेहरुसँग एकताको संभावा टरेको भन्दै कार्यदल विघटनको संकेत गरेका छन् ।

आज भएको राष्ट्रियसभाको निर्वाचनमा पार्टीका उम्मेदवार रामबहादुर थापा एमालेकै नेपालपक्षको असहयोगबाट पराजित भएको निश्कर्ष निकाल्दै पोखरेलले सामाजिक संजाल फेसबुकमा नेपालपक्षका गतिविधि लज्जास्पद नाटकमात्र नभई कम्युनिष्ट आन्दोलन र संसदीय र लोकतान्त्रिक आन्दोलनका लागि लज्जास्पद विषय भएको टिप्पणी गरेका हुन ।

“राष्ट्रिय सभाका लागि आज भएको उपनिर्वाचनमा देखिएका हर्कतहरु अत्यन्तै निष्कृष्ट र अक्षम्य छन्  । यस खाले अराजक कृत्यले नेकपा ( एमाले) भित्र बनिरहेको एकताको वातावरण धुमिल बनाइदिएको छ । पार्टी विरूद्धमा आज  गरिएका यी अपराधपूर्ण कामले पार्टी विधान, पद्दति , प्रक्रिया, नीति , निर्णय र निर्देशनको वकालत गर्दै भइरहेका नाटक मञ्चनको मुकुण्डो पनि उदांगो भएको छ ।’ पोख्रेलले लेखेका छन् ।

यस्तै महासचिव पोख्रेलले माधव समुह माथि आफ्नै पार्टीका अध्यक्षलाई संसदमा विश्वासको मत दिन उपस्थित नहुने, कर्णालीको प्रदेश सभामा फ्लोर क्रस गर्ने, लुम्विनीमा त्यसैको पुनरावृत्ति गर्न खोज्ने र आज आएर ‘सूर्य’ चिन्ह बाहक आफ्नै उम्मेदवारलाई हराएर विपक्षीहरुको गोटी बनेको आरोप माधवपक्षमाथि लगाएका छन् ।

आजको निर्वाचनले एमाले विरोधी महागठबन्धनका बाबजुद नेकपा (एमाले) एक्लै चुनौतीको सामना गर्न सक्षम छ भन्ने  कुरा आज स्पष्ट भएको भन्दै  विषम अबस्थामा पार्टी विभाजनका विरूद्ध दृढतापूर्वक उभिदै पार्टी र आन्दोलनको रक्षामा जुट्न आवश्यक रहेको बताएका छन् ।