शीतलनिवास पुग्याे १ सय ४९ सांसदको हस्ताक्षरसहितको पत्र

७ जेठ, काठमाडौं । नेपाली कांग्रेसका सभापति शेर बहादुर देउवालाई प्रधानमन्त्री बनाउन माग गर्दै शीतल निवास पुगेका विपक्षी दलका नेताहरु पत्र दर्ता गरेर निस्किएका छन् ।

देउवालाई प्रधानमन्त्री बनाउनका लागि १४९ सांसदको हस्ताक्षरसहित शीतल निवास पुगेका विपक्षी दलका नेताहरु पत्र दर्ता गरेर निस्किएका हुन् ।कांग्रेसका बरिष्ठ नेता रामचन्द्र पौडेलले राष्ट्रपति विद्यादेवी भण्डारीसमक्ष १ सय ४९ सांसदको हस्ताक्षर देखाएर, बहुमत प्रस्तुत गरेर निस्किएको बताए ।

त्यस्तै प्रधानमन्त्री पदका लागि केपी ओलीले हस्ताक्षर नबुझाएको उल्लेख गर्दै उनले आफूहरुले सांसदको हस्ताक्षरसहित दाबी गरेका बताए । प्रधानमन्त्रीमा राष्ट्रपतिले आह्वान गरेअनुसार संविधानको धारा ७६ को ५ का लागि देउवाको नामसहित दाबी गरेको उनले बताए ।

समर्थकहरुमा माओवादी अध्यक्ष पुषपकमल दाहाल, एमाले बरिष्ठ नेता माधवकुमार नेपाल, जसपा अध्यक्ष उपेन्द्र यादव र नेता बाबुराम भट्टराई तथा जनमोर्चाकी नेता दूर्गा पौडेल रहेका छन् ।