राज्यको सम्पूर्ण शक्ति र श्रोत परिचालन गरी कोरोना नियन्त्रण गर्न राप्रपाकाे माग

९ जेठ, काठमाडाैं । सत्तारुढ दलको आन्तरिक विवाद तथा प्रमुख विपक्षी दलको अकर्मण्यता तथा बारम्वार भैरहेको संविधानको अवहेलनाको परिणाम स्वरूप फेरि दोस्रो पटक प्रतिनिधिसभा विघटन हुन पुगेको छ । विगत केही वर्षयताका घटनाक्रमहरूको कारण वर्तमान संविधान र व्यवस्थाको औचित्य माथि नै बारम्वार गम्भीर प्रश्नचिन्ह खडा भएको हो ।

राष्ट्रिय प्रजातन्त्र पार्टीका केन्द्रीय सचिवालय प्रमुख भास्कर भद्रा ‘ध्रुब बहादुर प्रधान’द्धारा जारी विज्ञप्तिमा अहिले देशमा जुन परिस्थितिको बिकास भएको छ, त्यसको मूलजरो कथित बाह्र्र बुँदे सहमति, सो समझदारीको जगमा खडा गर्न खोजिएको राजनीतिक प्रणाली, हिन्दुराष्ट्र र राजसंस्थालाई षडयन्त्रपूर्वक हटाउने कार्य तथा सो परिवर्तनका संवाहकहरूको सत्तालिप्सा र आमजनताप्रतिको उपेक्षा हो भनिएकाे छ ।

विज्ञप्तिमा अगाडि भनिएकाे छ, नेपाली जनताको अभिमत र शक्तिबाट उपरोक्त कमजोरी र विकृतिको समाधान खोज्न सकिन्छ भन्ने बिश्वासको कारण राप्रपा सिद्धान्ततः चुनावको पक्षमा रहेको छ । तर, यस सन्दर्भमा संविधान, विधि र कानुनको पूर्ण पालना र सम्मान हुनुपर्छ ।

कोरोना महामारीको विषम परिस्थितिमा अहिले देशलाई चुनावमा धकेलिएको छ । यस्तो डरलाग्दो महामारीकाबीच चुनावमा कसरी जाने भन्ने गम्भिर प्रश्न खडा भएको छ। कोरोना महामारी नियन्त्रण नगरी स्वतन्त्र र निष्पक्ष चुनाव हुन सक्दैन जारी विज्ञप्तिमा उल्लेख छ ।