सभामुख र पूर्वसभामुखबीच छलफल सुरु

११ जेठ, काठमाडौं । सभामुख अग्निप्रसाद सापकोटा र पूर्वसभामुखहरूबीच छलफल सुरु भएको छ। नयाँ बानेश्वरस्थित संघीय संसद् भवनको ल्होत्से हलमा सभामुख र पूर्वसभामुखबीच छलफल सुरु भएको हो।

प्रधानमन्त्री केपी ओलीको सिफारिसमा राष्ट्रपति विद्यादेवी भण्डारीले प्रतिनिधिसभा विघटन गरेपछिको अवस्थाबारेमा रायसुझाव लिन सभामुख सापकोटाले पूर्वसभामुखहरूसँग छलफल गरेको उनको सचिवालयले जानकारी दिएको छ।

छलफलमा पूर्व सभामुखहरू ओनसरी घर्ती, कृष्णबहादुर महरा, रामचन्द्र पौडेल सहभागी छन्। तर एमाले संसदीय दलका उपनेता समेत रहेका संविधानसभाका अध्यक्ष सुवास नेम्वाङ भने छलफलमा सहभागी छैनन्।

नेम्वाङले कार्यव्यस्तताका कारण छलफलमा सहभागी हुन नसक्ने सभामुख सापकोटालाई जवाफ पठाएका छन्।