अब निषेधाज्ञाको पालना नगर्नेलाई अध्यादेश अनुसार कारबाही

११ जेठ, काठमाडौं । काठमाडौं उपत्यकामा कोरोना भाइरस संक्रमणको दर नघटेपछि फेरि एक साता निषेधाज्ञा थप गरिएको छ । मंगलबार बसेको काठमाडौं, भक्तपुर र ललितपुरका तीन प्रमुख जिल्ला अधिकारीको संयुक्त बैठकले निषेधको आदेश थप्दै निषेधाज्ञामा कडा प्रावधान ल्याएको हो ।

आज बसेको बैठकले अब लागू हुने निषेधाज्ञाको पालना नगर्नेलाई हालै जारी कोभिड–१९ अध्यादेश अनुसार कारबाही गर्ने पनि निर्णय पनि गरेको छ ।अध्यादेशमा अनुमतिविना वा बिरामी ओसारपसार गर्ने प्रायोजनबाहेक सवारीसाधन चलाउनेलाई कारबाही गर्नसक्ने व्यवस्था छ । त्यस्तो अवस्थामा दुईपांग्रेलाई दुई हजार र अन्य सवारीसाधनलाई ५ हजार रुपैयाँ जरिवाना तिराउन सक्ने भनिएको छ ।

मास्क नलगाई सार्वजनिक स्थलमा आवतजावत गर्नेलाई पनि पटकैपिच्छे एकसय रुपैयाँ तिराउन सक्ने व्यवस्था छ । साथै, हिंडडुलमा रोक लगाएको अवस्थामा विना काम निस्किनेलाई दुई सय रुपैयाँ तिराउन सक्ने भनिएको छ ।

दोस्रो लहरको कोरोना संक्रमण बढेको भन्दै उपत्यकाका तीन प्रशासन कार्यालयले १६ देखि २२ वैशाखसम्म पहिलो पटक निषेधाज्ञा लगाएको थियो । त्यसपछि २२ देखि २९ वैशाख र २९ देखि १३ जेठसम्मका लागि निषेधको आदेश जारी भएको थियो ।