कांग्रेस महाधिवेशन नहुने, एक वर्षका लागि सहमतिमा पदाधिकारी

१४ जेठ, काठमाडौं । महामारीको बढ्दो संक्रमणले गर्दा नेपाली कांग्रेसको भदौमा गर्ने भनिएको १४ औं महाधिवेशन प्रभावित हुने भएको छ । त्यसको छनक हिजै पनि नेताहरुले दिएका छन् ।

प्रेस युनियनको स्थापना दिवसमा सहभागी भर्चुअल बैठकमा पार्टी सभापति शेरबहादुर देउवा र वरिष्ठ नेता रामचन्द्र पौडेलले यस्तो संकेत गरेका हुन् । तत्काल सबै प्रकृया पूरा गरेर निर्धारित समयमा महाधिवेशन गर्न नसकिनेमा नेताहरु सहमत छन् । त्यसैले विकल्पमा के गर्ने भनेर छलफल भइरहेको छ ।

आज बिहान मात्रै पार्टी सभापति देउवाले पूर्व महामन्त्री कृष्णप्रसाद सिटौलासँग यसबारे छलफल गरेका छन् । छलफलमा तत्कालका लागि एक वर्षका लागि सहमतिमा नै महाधिवेशन गर्ने भनिएको छ ।

यो विषयमा कोरोना अली निस्तेज भएपछि केन्द्रीय कार्यसमिति बैठक राखेर निर्णय गरिनेछ । यसबारे वरिष्ठ नेता पौडेलसँग पनि देउवाले छलफल गर्ने भएका छन् । यसो गर्दा नेताहरुले एक वर्षका लागि सबै पदाधिकारी सहमतिमै चयन गर्ने छन् ।