राष्ट्रपति भण्डारीद्वारा कोरोना खोप उपलब्ध गराउन बाइडेनलाई अनुरोध

१५ जेठ, काठमाडौं । राष्ट्रपति विद्यादेवी भण्डारीले अमेरिकी राष्ट्रपति जो बाइडनलाई पत्र पठाउँदै कोरोनाविरुद्धको खोप उपलब्ध गराइिदन अनुरोध गरेकी छिन्।

राष्ट्रपति भण्डारीको पत्र अमेरिकाका लागि नेपाली राजदूत डा. युवराज खतिवडाले अमेरिकाको विदेश मन्त्रालयमा बुझाए। विदेश मन्त्रालयमार्फत राष्ट्रपति कार्यालयसम्म उक्त पत्र पुग्नेछ ।

पछिल्लो समय नेपालले विभिन्न देशसँग स्वास्थ्य सामग्री तथा खोप सहयोग मागिरहेको छ । अमेरिकाले यसअघि अत्यावश्यक स्वास्थ्य सामग्रीहरु प्रदान गरिसकेको छ । अहिले अमेरिकाले विभिन्न देशलाई खोप बाँड्न लागेको छ ।

करिब ८ करोड डोज खोपमध्ये केही नेपाललाई पनि सहयोगस्वरुप उपलब्ध गराइदिन राष्ट्रपतिले आग्रह गर्नुभएको हो । यसका साथै अमेरिकासँग नेपालले ५० लाख डोज खोप खरिद गर्न समेत चाहेको छ ।