महन्थले पुरानै पार्टी ब्यूउँताउने

१६ जेठ, काठमाडौं । चरम राजनीतिक विवाद र खिचातानीमा परेको जनता समाजवादी पार्टी अब भने विभाजनको दिशामा अग्रसर भएको छ । अध्यक्षद्वय महन्थ ठाकुर र उपेन्द्र यादवबीच सत्ता संघर्षका कारण बढेको मनमुटाव अब भने विभाजनकै नजिक पुगिसकेको छ ।

दुवै अध्यक्षले एक अर्कालाई २४ घण्टे स्पष्टीकरण सोधेकोमा आज त्यो पूरा भएसँगै निष्काशनको प्रकृया सुरु गर्न लागेका छन् । तर राजनीतिक दल सम्बन्धी ऐनले केन्द्रीय कार्यसमितिले गरेको निर्णयका आधारमा कारबाही हुने भएकाले ठाकुरमाथिकोले वैधता पाउने अवस्था छ ।

त्यसैले ठाकुर आफ्नो पक्षमा वहुमत जुटाउने प्रयासमा छन् । तर कार्यसमितिमा उनले बहुमत जुटाउने अवस्था देखिंदैन । बरु अब पुरानो राष्ट्रिय जनता पार्टी नै ब्यूँताउने पक्षमा उनी रहेको स्रोत बताउँछ ।

आज दिउँसो १ बजेसम्म स्पष्टीकरणको म्याद दिएका यादवले पनि ठाकुरको रेस्पोन्सका आधारमा थप निर्णय लिने तयारी गरेका छन् । ठाकुर भने उपेन्द्रलाई कुनै जवाफ नदिने बरु पुरानै पार्टी पुनर्गठन गर्ने भएका छन् ।

विघटित संसद्मा उनका पक्षमा यादव निकट सांसद्समेत आएका छन् । उनीहरुलाई समेत व्यवस्थापन गर्ने गरी नयाँ विधान तयार गरेर पुरानो पार्टी नै ब्यूँताउने उनको तयारी रहेको छ । सरकारमा जानुअघि नै यो सबै प्रकृया पूरा गर्ने पक्षमा उनी छन् । त्यसैले आज भोलि नै पुरानो पार्टी ब्यूँताउने उनको मनसाय देखिएको छ ।