महन्थलाई जोगाउन दूतावासको चलखेल !

१६ जेठ, काठमाडौं । केन्द्रीय कार्यकारिणी परिषदमा अल्पमतमा रहेका जनता समाजवादी पार्टीको महन्थ ठाकुरलाई आधिकारिकता दिन भारतीय पक्ष खुलेरै मैदानमा ओर्लिएको छ । लैनचौरस्थित दूतावासका कर्मचारीले परिषदका कतिपय सदस्यलाई लोभ्याएका छन् ।

स्रोतका अनुसार, हरेक सदस्यलाई एक करोड रुपैयाँसम्म अफर गरिएको छ । दूतावासका कर्मचारीले फोन गरेर महन्थलाई साथ दिन लालच दिन थालेका छन्–कार्यकारिणी परिषदका एक सदस्यले भने ।

हाल ५१ सदस्यीय कार्यकारिणी समितिमा उपेन्द्र यादव पक्षमा ३० जना सदस्य रहेका छन् । कार्यकारिणीमा बहुमत नभएकाले महन्थ पक्षले पार्टी फुटाउनुपर्ने अवस्था सिर्जना भएको छ । त्यसैले सदस्यहरुलाई प्रभावित पार्न यस्तो अफर आउन थालेको हो ।

पार्टीको आधिकारिकता आफ्नो पक्षमा नभएसम्म सरकारमा समेत नजाने दाउमा महन्थ पक्ष रहेका छन् । तर अर्का नेता राजेन्द्र महतो भने तत्काल सरकारमा गइहाल्न दबाब सिर्जना गरिरहेका छन् ।

दूतावासको चलखेलले विघटित संसदीय दलमा समेत ठूलो फेरबदल भएको छ । ३२ सदस्यीय संसदीय दलमा ठाकुर र उपेन्द्र दुबै पक्षको आधा आधा अर्थात १६ जना सांसद थिए । तर पछिल्लो अवस्थामा महन्थ पक्षमा २० र उपेन्द्र पक्षमा १२ जना मात्र रहेका छन् । चार जना सांसद्लाई समेत दूतावासले खरिद गरेको स्रोतको भनाई छ ।