संवैधानिक इजलाश विवादमा वरिष्ठ न्यायधीशको बैठकले निर्णय लिने

१७ जेठ, काठमाडौं । प्रतिनिधिसभा विघटनविरुद्ध जारी संवैधानिक इजलाशका दुई विवादास्पद न्यायधीशहरु तेजबहादुर केसी र बमकुमार श्रेष्ठले इजलाश नछाड्ने निर्णय गरेपछि सुनुवाई थप जटिल बन्ने देखिएको छ ।

निवेदकतर्फका कानून व्यावसायीहरुले न्यायधीशद्वय केसी र श्रेष्ठ बायस रहेको भन्दै उनीहरुले मुद्धाको सुनुवाई गर्न नमिल्ने भन्दै आपत्ति जनाएका थिए । हिजो सर्वाेच्च अदालतमा भएको वहस यही विषयमा केन्द्रित भएपछि प्रधानन्यायधीश चोलेन्द्र शम्शेर राणाले आजसम्म यसबारे निर्णय दिने बताएका थिए ।

तर उनीहरुले इजलाश नछाड्ने निश्कर्ष प्रधानन्याधीश राणालाई सुनाएपछि अब कसरी जाने भन्नेमा अदालत भित्रै छलफल थालिएको छ । संवैधानिक इजलाशमा रहेका अरु दुई जना न्यायधीशहरु दीपककुमार कार्की र आनन्दमोहन भट्टराईले विवादमा परेका न्यायधीशले इजलाश छाड्नुपर्ने सुझाव दिएका थिए ।

अब विवाद भएको छ, यही इजलाशले सुनुवाई गर्नेमा शंका छ– एक जना कानून व्यावसायीले बताए । न्यायधीशद्वय कार्की र भट्टराईले यस्तो मत राखेपछि प्रधानन्याधीश राणा थप दबाबमा परेका छन् । यद्यपि उनले न्यायधीशहरुले इजलाशमा बस्छु भनेकाले दिनुपर्ने राय प्रकट गरेका थिए । तर कार्की र भट्टराईले आफूहरु विवादमा परेर सुनुवाई नगर्ने बरु हट्ने अडान लिएको पनि स्रोतले बताएको छ ।

उनीहरुले यो विषय गम्भिर भएकाले रोष्टरमा रहेका सबै १३ जना न्यायधीश नै बसेर एउटा मापदण्ड बनाएर मात्रै सुनुवाई थाल्नुपर्ने धारणा राखेका छन् । उनीहरुको राय राणाले मानेका छैनन् । तर अधिकांश वरिष्ठ न्यायधीशहरुले बैठक बसेर मात्रै यो विषयमा निर्णय गर्दा उचित हुने सल्लाह प्रधानन्याधीश राणालाई दिएका छन् । त्यसैले सम्भवतः आजै रोष्टरमा रहेका १३ जना न्यायधीश बसेर एउटा निर्णय होला–स्रोतले भन्यो । भोलिबाट यो रिटमाथि नियमित सुनुवाई हुँदैछ ।