पोखरेल र भट्टराईबीच अर्थपूर्ण भेट, माधव नेपाल फकाउने सुत्रको खोजी

१९ जेठ, काठमाडौं । एमालेबाट निष्कासित नेता माधव नेपालले नयाँ दल खोल्ने तयारी गरिरहेका बेला एमालेका दोस्रो पुस्ताका नेताले ओली पक्षका नेताहरुसँग पार्टी विभाजन हुन नदिन आग्रह गरिरहेका छन् । आज दिउँसो एमाले महासचिव ईश्वर पोखरेलसँग एमाले स्थायी कमिटी सदस्य योगेश भट्टराइले भेट गरी माधव नेपाल लगायतका नेताहरुसहितको एमाले भएमात्रै एमालेको अस्तित्व रहने र त्यसका लागि पहल गर्न आग्रह गरेका हुन् ।

एमाले अध्यक्ष केपी शर्मा ओली र वरिष्ठ नेता माधवकुमार नेपालबीच संवाद गराउने कोशिशमा रहेका दोस्रो पुस्ताका नेताहरु मध्ये योगेश भट्टराईले महासचिव तथा उपप्रधानमन्त्री पोखरेलबीच एक घण्टा बढी कुराकानी भएको र त्यसक्रममा पार्टीको आन्तरिक विवाद मिलाउन आग्रह गरेको स्रोतको दावी छ ।

बुधबार दिउँसो सिंहदरवारमा उनीहरुबीच छलफल भएको हो । दुई नेताबीच यसअघि पनि कुराकानी भैरहेको थियो । दुवै नेताहरुकै कुराकानीका कारण एकपटक ओली र नेपालबीच संवाद पनि भएको थियो । तर पछिल्लो समय एमालेबाटै निष्कासनमा परेका एमाले वरिष्ठ नेता माधव नेपालले क्रान्तिकारी पार्टी गठन गर्ने भन्दै आफू निकटका नेताहरुसँग छलफल गरिरहेको तथा नेपाललाई फकाउन ओली समूह लागिरहेका बेला उनीहरु दुई जनाबीचको भेटघाटलाई अर्थपूर्ण रुपम लिइएको छ ।

‘महासचिव र भट्टराईबीच भेटघाट भएको थियो, उहाँहरुबीच पार्टीभित्र देखिएको आन्तरिक समस्या र विभाजनको डिलमा पुगेको एमालेलाई कसरी व्यूताउने भन्ने बारेमा छलफल भएको छ’, महासचिव पोखरेल निकट स्रोतले भन्यो ।

एमालेमा माधव नेपाल नेतृत्वको असन्तुष्ट समूहतर्फ निकट रहेका भट्टराई केही समयदेखि अध्यक्ष तथा प्रधानमन्त्री ओलीतर्फ निकट बन्दै गइरहेको भएपनि ओलीको साथमा लागिसकेका भने छैनन् । उनकै पहलमा विभिन्न चरणमा कुराकानी भैरहेको भएपनि वार्ताले सकारात्मक निकास भने पाउन सकेको छैन ।

आज बस्ने भनिएको स्थायी कमिटी बैठक समेत स्थगित भएका बेला भट्टराईले पोखरेललाई भेटेर माधवकुमार नेपाललाई मनाउन आग्रह गरिएको बुझिएको छ । भट्टराइले शेरबहादुर देउवालाई प्रधानमन्त्री बनाउने विषयमा माधव नेपालसँग असहमति राख्दै हस्ताक्षर गरेका थिएनन ।