प्रधानन्यायाधीश राणा अकस्मात बिरामी

२४ जेठ, काठमाडौं । प्रतिनिधिसभा विघटनविरुद्ध परेको रिट उपर सुनुवाई सुरु भएपनि अझै मूल विषयमा केन्द्रित बहस हुन सकेको छैन । हिजो दोस्रोपटक गठन भएको संवैधानिक इजलाशमा रहेका दुई जना न्यायधीशको निष्पक्षताप्रति सरकारी पक्षले लफडा गरेकाले विषय प्रवेश नै हुन सकेन ।

इजलाश हेर्दाहेर्दैको अवस्थामा आजका लागि स्थगित भएको थियो ।  तर आज फेरि प्रधानन्यायधीश चोलेन्द्रशमशेर राणा बिरामी परेको भन्दै सुनुवाई रोकिएको छ ।

प्रधानमन्त्री केपी ओलीको असंवैधानिक कदम तत्कालै सच्चिने आम अपेक्षा विपरित विभिन्न बाहानामा अदालती कारबाही प्रभावित भइरहेको छ । आज बिहानै प्रधानन्यायाधीश राणाले सर्वाेच्च प्रशासनलाई आफू बिरामी परेकाले अदालत आउन नसक्ने जानकारी गराएका थिए ।

यद्यपि उनले आफूलाई के भएको भनेर प्रष्ट्याएका भने छैनन् । उनले संवैधानिक इजलाशको अर्काे पेशी बुधबारका लागि राख्न पनि अह्राएका छन् ।