रामदेवले कोरोना विरुद्धको खोप लगाउने

२८ जेठ, एजेन्सी । कोरोना भाइरस कोभिड-१९ विरुद्धको खोप रामदेवले छिट्टै लगाउने भएका छन् । एलोप्याथिक उपचार पद्धतिको विरोध गर्दा विवादमा आएका पतञ्जलि आयुर्वेदिक संस्थाका संस्थापक रामदेवले कोरोना खोप लगाउने घोषणा गरेका हुन् ।

भारतीय समाचार एजेन्सी पीटीआईका उनले बिहीबार यस्तो घोषणा गरेका हुन् । उनले चिकित्सकहरुलाई ‘धर्तीमा रहेका ईश्वरका दूत’ संज्ञा समेत दिएको पीटीआईले जनाएको छ ।

यसअघि प्याथोलोजी लगायत आधुनिक चिकित्सा पद्धतिको विरोधमा उत्रिएपछि रामदेवविरुद्ध भारतका चिकित्सकहरुले देशव्यापी विरोध गर्दै उनीविरुद्ध कानुनी उपचारको खोजी गर्ने चेतावनी समेत दिएका थिए ।