झापामा करेन्ट लागेर २ जनाको ज्यान गयो

२८ जेठ, झापा । अर्जुनधारा नगरपालिका-३ बस्ने ८२ वर्षीया गल माँया खड्काको करेन्ट लागेर बिहीबार दिउँसो मृत्यु भएको छ । आफ्नै घरको पानी तान्ने मोटर चलाउने क्रममा करेन्ट लाग्दा गम्भीर घाइते भएकी उनको बिर्तासिटी अस्पताल बिर्तामोडमा उपचारको क्रममा मृत्यु भएको हो ।

यसैगरी झापा, कमल गाउँपालिका-७ लालधोन्द्रास्थित खेतमा पानी लगाउन जडान गरिएको मोटर चलाउने क्रममा करेन्ट लागेर सोही ठाउँ बस्ने महेन्द्र धिमालको भान्जा मोरङ बेलबारी नगरपालिका-४ तेलकुरी बस्ने १४ वर्षीय सन्देश धिमालको बिहीबार दिउँसो मृत्यु भएको छ ।

करेन्ट लागेर गम्भीर घाइते भएका उनको उपचारको लागि लाइफ लाइन अस्पताल दमकतर्फ लैजाने क्रममा बाटोमै मृत्यु भएको हो । यस सम्बन्धमा प्रहरीले थप अनुसन्धान गरिरहेको छ ।