सत्यवती तालसम्म पुग्न केवलकार जडानको तयारी

३१ जेठ,  काठमाडौं । पाल्पा जिल्लाको तिनाउ गाउँपालिकामा रहेको ऐतिहासिक, धार्मिक, पर्यटकीय स्थल सत्यवती तालसम्म पुग्नका लागि  केवलकार जडान गरिने भएको छ । निजी क्षेत्रको लगानीमा सिदार्थ राजमार्गदेखि सत्यवती तालसम्म करिब एक हजार ३५० मिटर लामो केवलकार जडान गर्न लागिएको हो ।

सिद्धार्थ राजमार्गको चौबिसमाइलदेखि सत्यवती तालसम्म केवलकार जडान गर्ने तयारी छ । सत्यवती मन्दिरमा केबुलकार सहित अन्य संरचना निर्माणका लागि निजी क्षेत्रबाट एक अर्ब १० करोड लगानी गरिने सत्यवती दर्शन प्रालिका सञ्चालक डिल्लीराम बस्याले जानकारी दिएका छन् ।

हालसम्म केबलकार निर्माणका लागि डीपीआर तयार भईसकेको, केबलकारसहित होटल, बगैँचा र अन्य पूर्वाधारका लागि आवश्यक जग्गा खरिदको काम सकिएको बस्यालले बताउनुभयो । केबलकारको संरचना निर्माण सुरु गरेको डेढ वर्षभित्र सबै काम सकिने गरी काम थाल्ने लगानीकर्ताले जनाएका छन् ।

सत्यावती ताल पाल्पा जिल्लाको तिनाउँ गाउँपालिका वडा नं. ४ मा डाँडामा छ । त्यहाँ चिच्याएर सत्यवती बज्यै वर देउ भनेर वर माग्ने पुरानो चलन छ । सत्यवती तालमा कार्तिक पूर्णिमाको दिन ३ दिनसम्म मेला लाग्दछ । यहाँ भारतको गोरखपुरबाट समेत मानिसहरु दर्शन गर्न आउँछन् । सत्यवती माईले दिएको वर पुग्दछ भन्ने आम मानिसमा मान्यता छ । सत्यवती तालको लागि कात्तिक पूर्णिमा विशेष पर्व हो ।