एमालेको विवाद मिल्दा माधव नेपाल दोस्रो अध्यक्ष कि प्रधानमन्त्री ?

३१ जेठ, काठमाडौं । सत्तारुढ दल नेकपा एमालेको आन्तरिक विवाद मिलाउने क्रममा वरिष्ठ नेता माधवकुमार नेपाललाई तत्कालै कसरी व्यवस्थापन गर्ने भन्ने बारेमा अनौपचारिक छलफल शुरु भएको छ । केही दिन अघि ओली पक्षले पार्टीको दोस्रो अध्यक्ष प्रस्ताव गरिएपनि उनले अस्वीकार गरेपछि उनको व्यवस्थापनको बारेमा अनौपचारिक छलफल शुरु भएको हो । पार्टी अध्यक्ष केपी ओलीबाटै दोस्रो अध्यक्ष भएर काम गर्नुस भन्ने प्रस्ताव राखेको तर त्यसलाई नेपालले अस्वीकार गरेको स्रोतको दावी छ ।

नेपाल स्रोतका अनुसार भने उनलाई पार्टीको द्वितीय अध्यक्षका रूपमा प्रस्ताव गरिएको थियो । उक्त प्रस्तावमा दोस्रो पुस्ताका नेताहरूबीच संवाद चलिरहेका बेला ओलीले पार्टी एकताका लागि भन्दै आह्वान गरेपछि नेपालले अब यो द्धितीय अध्यक्षको कुरा लिएर कोही पनि नआउनु भनेका थिए  । उनको आह्वानमा जेठ ३ अघिको अवस्थामा फर्किने प्रस्ताव भए पनि गत फागुन २३ यताका निर्णय के गर्ने भन्ने स्पष्ट नभएकाले तिनलाई यथावत् राखेपछि नेपाल पक्षका नेताहरुले थप स्पष्ट पार्नुपर्ने बताइरहेका छन् ।

तर नेपाल समूहले प्रति विज्ञप्ति जारी गरेर जेठ २ गतेको अवस्थमा फर्कन ओलीले आनाकानी गरेको जालझेल गरेको बताइसकेका छन् । नेपाल पक्षका नेताहरुले यसलाई प्रधानमन्त्री ओलीले अब एक पद छाडेर नेताहरुको व्यवस्थापनमा ध्यान दिनुपर्ने बताइरहँदा नेपाल स्वंय भने मौन रहेका छन् ।

कांग्रेससँगको सहकार्यमा प्रधानमन्त्री बन्न सक्ने संभावना समाप्त भएपछि ओली पक्षका नेताहरुले सर्वोच्च अदालतको फैसला अनुसार पार्टी मिलाउनु पर्ने भन्दै मध्यमार्गी बाटो अपनाएको बेला विपक्षी दलले ओलीको नेतृत्वमा निर्वाचनमा जाने संभावना कम भए नेपाललाई प्रधानमन्त्रीको रुपमा अघि सारेर भएपनि चुनावमा जानुपर्ने धारणा आएको र सो विषयमा छलफल हुन थालेको स्रोतको दावी छ ।

यसअघि दोस्रो तहका नेताहरु सुवास नेम्वाङ, विष्णु पौडेल, प्रदीप ज्ञावाली, विष्णु रिमाल, भीम रावल, घनश्याम भूषाल,सुरेन्द्र पाण्डे, गोकर्ण विष्टबीच याक एण्ड यति होटलमा भएको पहिलो कुराकानीको क्रममा नेपाललाई द्धितीय अध्यक्ष बनाउने र पार्टीको सबै जिम्मेवारी दिनेगरी कुरा अघि बढाउन खोजिएको थियो ।

प्रधानमन्त्री ओलीले सरकार सञ्चालन र नेपालले पार्टी सञ्चालन गर्ने गरी विभिन्न चरणमा कुरा गर्ने तथा माधव नेपाललाई मनाउने सहमति भैसकेको थियो । तर नेपाललाई दोस्रो अध्यक्ष दिने कुरा चलिरहेको बेला नेता आफैले यो विषयमा छलफल नगर्न आफू निकटका नेताहरुलाई सुझाव दिएका थिए । यस विषयमा उपप्रधानमन्त्री समेत रहेका अर्थमन्त्री विष्णु पौडेलले नेता नेपाललाई कन्भिन्स गर्न खोजिरहेको स्रोतको दावी छ ।

वरिष्ठ नेता नेपाललाई उनकै किचन क्याविनेटमा रहेका प्रकाश ज्वाला, जगन्नाथ खतिवडा, राजेन्द्र राई विजय पौडेल, बेदुराम भूषालले ओलीलाई प्रधानमन्त्री वा पार्टी अध्यक्ष मध्ये एक पद छोड्न लगाउनु पर्ने भन्दै वरिष्ठ नेपाललाई सुझाव दिएका छन् । नेपालले पनि यसअघि एक पद एक व्यक्तिको कुरा उठाउँदै आएका थिए । उनका अनुसार ओलीले पार्टी मिलाउनका लागि नेपाललाई दोस्रो अध्यक्ष प्रस्ताव गरेका थिए । नेपाल नेपाल पक्षकै नेताहरु बाधक भएपछि उनले दोस्रो अध्यक्ष अस्वीकार गरेका हुन् ।

नेपाल समूहकै केही नेताहरुले भने दोस्रो अध्यक्ष स्वीकार गरेर जानु पर्ने मत राखिरहेका छन् । विरोध खतिवडा, गणेश पहाडी, नारायण खतिवडा, पवित्रा निरौला लगायतका सांसदहरुले पनि दोस्रो अध्यक्ष स्वीकार गर्नुपर्ने मत राखेका थिए । त्यसमध्येका गणेश पहाडी भने ओली क्याम्पबाट मन्त्री भैसकेका छन् । त्यस्तै सोमप्रसाद पाण्डे र ठाकुर गैरेले पनि पार्टीको विवाद मिल्छ भने दोस्रो अध्यक्ष स्वीकार गर्नुपर्ने धारण राखेका बेला नेपालले अस्वीकार गरेका हुन् ।

पार्टीलाई एकता बनाउने भन्दै ओलीले जेठ २३ गते जारी गरेको ६ बुँदे प्रस्तावमा २०७५ जेठ ३ गते पूर्वको अवस्थाबाट पार्टीलाई सञ्चालन गरिने र माधव नेपाल समूहले शेरबहादुर देउवालाई प्रधानमन्त्री बनाउनु पर्ने माग गर्दै सर्वोच्च अदालतमा दायर गरिएको रिटमा भएको हस्ताक्षर फिर्ता लिनुपर्ने शर्त राखेपछि दुवै पक्षका दोस्रो तहका नेताहरुले त्यो विषयमा छलफल शुरु गरेपनि हालसम्म कुनै टुंगोमा पुगेका छैनन ।

नेपाल पक्षले लोकतन्त्रको रक्षाका लागि गरिएको हस्ताक्षर फिर्ता नहुने ओलीले २०७५ जेठ ३ गते पूर्वको अवस्थाबाट पार्टी सञ्चालन गर्ने कुरा कदापी मान्य नहुने जनाएका छन् । जेठ २ कै पार्टी कमिटीबाट पार्टी सञ्चालन गर्नुपर्छ नवौ महाधिवेशनले निर्वाचित गरेको कमिटी हटाएर अर्को कमिटी बनाउने कुरा स्वीकार्य नहुने नेपाल पक्षका नेताहरुको अडान छ । नेपाल पक्षको यो अडानकै बीचमा ओलीले नेपाल समूहलाई पनि सहभागिता गराउने गरी असार २ गते स्थायी कमिटीको बैठक बोलाउने तयारी गरेको छ ।

ओली पक्षले २०७५ जेठ ३ पूर्व फर्किने प्रतिवद्धता जनाए पनि नेपालले वक्तब्य जारी गरेर अस्वीकार गरेपनि अहिले नेपाल पक्ष पार्टी एकताका लागि भन्दै केही लचिलो भएको छ । बाग्मती प्रदेश र प्रदेश १ मा नीति तथा कार्यक्रममा संस्थापन पक्षलाई समर्थन गरेर लचिलो भएको हो । यही बीचमा नेपाल पक्षका नेताहरुले अध्यक्ष ओलीले २३ जेठमा राखेको प्रस्ताव गोलमोटल भएको, कारवाही फूकुवा जस्ता विषयहरु नआएको, जेठ २ को बटमलाईनलाई नमानेको, नवौ महाधिवेशनबाट निर्वाचित पदाधिकारी र स्थायी कमिटीलाई ओलीको एकल निर्णयले हटाएको जस्ता विषयमा मौन रहेकाले थप स्पष्ट हुनुपर्ने धारणा राखिरहेका छन् ।