ओलीको चालमा रन्थनिएको एमाले

१ असार, काठमाडौं । नेकपा एमालेको संस्थापन पक्षले यही हप्ता असन्तुष्ट पक्षका नेताहरुलाई समेत सहभागी गर्ने गरी बोलाउन लागेको स्थायी कमिटी बैठकमा खनाल–नेपाल पक्षले भाग लेला त ? वरिष्ठ नेता माधवकुमार नेपाल भन्छन्–जेठ २ , २०७५ अघिको एमाले बैठक डाक्दा जान सकिन्छ । तर जेठ ३ अन्तर्गतको बैठक भने हाम्रा लागि स्वीकार्य छैन ।

प्रधानमन्त्रीसमेत रहेका एमाले अध्यक्ष केपी ओलीले असन्तुष्ट पक्षका माग पूरा गर्ने भन्दै त्यसका लागि खनाल–नेपाल पक्षलाई समेत सामेल गराएर स्थायी कमिटी राख्न पहल गरिरहेका छन् । यसका लागि ओलीले अर्थमन्त्री विष्णु पौडेललाई सकृय बनाएका छन् । पौडेलले अस्ती नेता नेपाल र हिजो वामदेव गौतमसँग यही विषयमा कुरा गरेका छन् ।

प्रधानमन्त्री ओलीकाे पछिल्लो चाहना भनेको प्रधानमन्त्री पदको निरन्तरता नै हो । तर नेपाल पक्षका २३ जनाले कांग्रेस सभापति शेरबहादुर देउवालाई प्रधानमन्त्री बनाउन हस्ताक्षर गरेका छन् । विघटित प्रतिनिधिसभा पुनस्थापनाको सम्भावना बढेको छ । त्यसैले देउवाको पक्षमा गरिएको हस्ताक्षर फिर्ता नै ओलीको एक मात्र लक्ष्य रहेको छ ।

ओलीलाई जनता समाजवादी पार्टीका २० जनाको समर्थन रहेको छ । त्यसैले उनी नेपाल पक्षका केही नेताको समर्थन लिन सके प्रधानमन्त्री पद सुरक्षित रहनेमा ढुक्क छन् । ओलीको यो चालबाजी नेता नेपालले नबुझेका होइनन् । यसैबीच सर्वाेच्च अदालतले ओलीद्वारा एकपक्षीय रुपमा दशाैं महाधिवेशन आयोजक कमिटी बनाएको निर्णय अवैधानिक भनेपछि नेपाल पक्ष अली सुरक्षित देखिएको छ ।

एमाले भित्र आफ्नो स्थान र भूमिकाप्रति नेपाल पक्षले सुरक्षाको अनुभूति गरेको छ । तर ओलीको भूमिका नै फेरि पनि निर्णायक मानिएको छ । ओलीले विपक्षीसँगको गठबन्धन टुटाउन पनि यस्तो रणनीति बनाएको हुन सक्ने अनुमान नेपाल पक्षको रहेको छ ।

त्यसलाई थप मजबूत बनाउने भन्दै हिजो मात्रै नेता नेपाल निवासमा कांग्रेस सभापति देउवा र नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’बीच छलफल भएको छ ।

ओलीले अहिलेपनि मनैबाट सहमति गर्न नचाहेको बुझाई नेपाल पक्षको रहेको छ । त्यसैले ओली पक्षको कदमपछि मात्रै आफूहरु अगाडि बढ्ने नेपाल पक्षको तयारी रहेको देखिन्छ ।