मुख्यमन्त्री पोखरेल चढेको हेलिकोप्टर फेरि चामेमै फर्कियाे !

३ असार, काठमाडौं । मौसममा खराबी आएपछि गण्डकी प्रदेशका मुख्यमन्त्री कृष्णचन्द्र पोखरेल चामेमा अड्किएका छन्। मनाङमा विगत केही दिनयता गएको बाढी र पहिरोको निरीक्षण गर्न गएका उनी अचानक मौसममा खराबी आएपछि हेलिकप्टर उड्ने अवस्था नरहेपछि रोकिएका हुन् ।

पोखराबाट बिहीबार दिउँसो राहत सामग्री लिएर गएका मुख्यमन्त्री पोखरेल, बिनाविभागीय मन्त्री राजीव गुरूङ ‘दीपक मनाङे’, सांसद चिन्तबहादुर घलेसहितको टोली चामेमा अड्किएका छन् । अहिले प्रभु एयरको हेलिकप्टरमा मुख्यमन्त्री फर्कने योजना थियो, उक्त हेलिकप्टर पनि बगरछापमा ल्याण्ड भएको छ।

चामेमा अहिले पनि सिमसिम पानी परिरहेको र बादलले आकाश ढाकेको स्थानीयले बताएका छन्। जसका कारण मौसम खराब भएकै कारण प्रभु एयरको हेलिकप्टर चामे पुग्न नसकेको जनाएको छ।

पोखरा फर्कने अवस्था नभएकाले मुख्यमन्त्री पोखरेलसहितको टोली आज चामेमै बास बस्ने  मुख्यमन्त्री पोखरेलले सामाजिक सञ्जाल फेसबुक मार्फत जनाएका छन् ।

नेपाली सेनाको हेलिकप्टरले बिहीबार बिहान मनाङको सिरानतालका २४ जना र थोंचे गुम्बाबाट ११ जनाको उद्धार गरेको थियो। गत सोमबारदेखि परेको अविरल वर्षाले मनाङको चामे, तालगाउँ, धारापानी लगायतका ठाउँमा घरहरू बगाउनुका साथै डुबानमा परेका छन्।

मनाङमा अड्किएका मुख्यमन्त्री पोखरेलले शुक्रबार विश्वासको मत लिँदैछन्। विश्वासको मत लिने प्रस्ताव संसद सचिवालयमा बुधबार नै दर्ता भइसकेको छ।

यता बाढी पहिराेबाटचामे र तिमाङका जलविद्युत आयोजना, एउटा बेलिब्रिज, ३ वटा काठे पुल लगायत बगाएको छ भने ५३ वटा घर क्षतिग्रस्त छन्। उक्त घरमा बस्ने करिब १ हजार जना विस्थापित हुन पुगेको छ । बाढी र पहिरोका कारण बेंसीशहर–चामे सडक पूर्णरूपमा ठप्प छ।