चामेमा अड्किएका मुख्यमन्त्री पोखरेल सकुशल पोखरा आइपुगे

४ असार, काठमाडौं । मनाङमा विगत केही दिनयता गएको बाढी र पहिरोको निरीक्षण गर्न गएका गण्डकी प्रदेशका मुख्यमन्त्री कृष्णचन्द्र पोखरेल सकुशल पोखरा आइपुगेका छन् ।

मनाङका बस्तीहरुमा गएको बाढी र पहिरोको निरीक्षण गर्न गएका मुख्यमन्त्री पोखरेल मौसमले साथ नदिएपछि बिहीबार साँझ चामेमा अड्किएका थिए, तर आज बिहानै मनाङ सदरमुकाम चामेको मौसम खुलेपछि उनी सकुशल पोखरा आइपुगेका हुन् ।

बाढी प्रभावितको अवस्था बुझेर त्यहि अनुसारको व्यवस्थापनका मुख्यमन्त्रीसहितको टाेली हिजो मनाङ गएको थियाे । पोखराबाट बिहीबार दिउँसो राहत सामग्री लिएर गएका मुख्यमन्त्री पोखरेल, बिनाविभागीय मन्त्री राजीव गुरूङ ‘दीपक मनाङे’, सांसद चिन्तबहादुर घलेसहितको टोली चामेमा अड्किएका थिए ।

मुख्यमन्त्री पोखरेल भन्छन्, नागरिकको रक्षा सरकारको पहिलो दायित्व हो । स्थानीय प्रशासनसँगको सहकार्यमा प्रदेश सरकारले उद्धार र राहतको कामलाई कुनै कसर नराखी अगाडि बढाउने छ । अहिले मनाङमा उद्धार र राहतको काम भइरहेको छ ।

 गण्डकीका मुख्यमन्त्री विश्वासको मत लिंदै

गण्डकी प्रदेशको मुख्यमन्त्रीमा नियुक्त कृष्णचन्द्र नेपाली पोखरेलले आज पोखरा सभागृह (हालको संसद भवन) मा  प्रदेशसभाबाट विश्वासको मत लिंदैछन् । यस प्रयोजनका लागि अहिले ११ बजे प्रदेशसभाको बैठक डाकिएको छ ।

संवैधानिक व्यवस्था अनुसार, मुख्यमन्त्री पोखरेलले नियुक्त भएको ३० दिन भित्र विश्वासको मत लिनुपर्ने हुन्छ । उनी गएको जेठ २९ गते मुख्यमन्त्रीमा नियुक्त भएका हुन् ।

यस हिसाबले उनले असारको २७ गतेसम्ममा विश्वासको मत लिन सक्थे । तर तत्कालै विश्वासको मत लिएर पूर्ण गतिमा सरकार चलाउने पक्षमा पोखरेल देखिएका छन् ।

हाल प्रदेश सभामा ५९ जना सदस्य रहेका छन् । जसमध्ये ३० जनाको मत भए बहुमत पुुग्ने अवस्था छ । अहिलेको हिसाबमा पोखरेलसँग स्वतन्त्र सांसद् दीपक मनाङेसहित ३१ जनाको समर्थन रहेको छ ।

त्यसैले आज उनले विश्वासको मत पाउने लगभग निश्चित छ । कदाचित विश्वासको मत नपाएको अवस्थामा प्रदेशसभा भंग भई ६ महिना भित्र निर्वाचन गराउनुपर्ने संवैधानिक व्यवस्था रहेको छ ।

प्रदेशसभामा एमालेको २७ , कांग्रेसको १५ , माओवादी केन्द्रको १२,राष्ट्रिय जनमोर्चाको २ , जनता समाजवादी पार्टीका २ र स्वतन्त्र १ जना रहेका छन् ।