एमाले एकताको पहल जारी

४ असार, काठमाडौं । एकातिर प्रतिनिधिसभा पुनस्थापनाको संभावना बढेपछि प्रधानमन्त्री केपी ओली पार्टी एकताको रट लगाउन तल्लिन छन् भने अर्कातिर वरिष्ठ नेता माधवकुमार नेपालको ध्यान नयाँ पार्टी निर्माणमा केन्द्रित छ ।

ओलीले प्रधानमन्त्री पद जोगाउन जालझेल मात्र गरेको भन्दै नेपाल पक्ष नयाँ रणनीति बनाउन अग्रसर देखिएपनि उनी पक्षकै केही नेता भने ओलीका दूतसँग अहोरात्र छलफलमा जुटेका छन् ।

एक महिनाअघि बनाइएको कार्यदलको बैठकका नाममा हिजो पनि दुबै पक्षका दोस्रो तहका नेताहरु लामै समय घोरिएका छन् । हिजो साँझ साढे ६ बजेदेखि करिब ९ बजेसम्म दुबै पक्षका नेताहरु ललितपुरस्थित समिट होटलमा बसेका थिए । तीन तीन घण्टा छलफल भएपनि कुनै ठोस प्रगति भने भएको छैन । तर प्रयास जारी छ– कार्यदलमा नयाँ सदस्यका रुपमा भित्र्याइएका नेता भीम आचार्यले भने ।

एमाले फुटबाट जोगाउनुपर्छ भन्नेमा हामी सहमत छौं , तर ओलीले धेरै गल्ती गरिसकेकाले सच्याउने तत्परता देखाइनुपर्छ – उनले भने । छलफलमा सहभागी अधिकांशले नयाँ सोच र धारणाका साथ पार्टीमा एकता कायम गर्नुपर्ने धारणा राखेको नेता सुभाषचन्द्र नेम्बाङले बताए ।

हामी पनि एकताकै पक्षमा हो , प्रधानमन्त्रीले त्यसका लागि अधिकतम लचकता देखाउनुभएको छ , अब पालो माधव कमरेड ( माधवकुमार नेपाल ) को हो – उनले भने । कार्यदलमा सहभागी सबैको एकै मत रहेका तर नेताहरुलाई भने कन्भिन्स गर्न नसकिएको उनको बुझाई छ । नेम्बाङले भने – प्रधानमन्त्रीले सबै तहमा लचकता देखाउने तत्परता देखाउनु भएको छ, अब त बल माधव कमरेडकै कोर्टमा छ नि ।

यस्तै अर्का नेता घनश्याम भूषालले पनि हिजोको छलफलमा धेरै कुरामा सहमति जुुटेको जानकारी दिए । तर ओलीले कसरी लिनुहुन्छ,त्यो हेरौं अनि मात्रै केही भन्न सकिने उनको धारणा छ । कार्यदलका साथीहरु बीचमा धेरै विषयमा प्रगति भएको छ, तर त्यो सहमतिलाई प्रधानमन्त्रीले कसरी लिनुहुन्छ त्यसैको आधारमा पार्टी एकताले आकार लिने उनले बताए ।

तर अहिल्यै देउवाको पक्षमा गरिएको हस्ताक्षर फिर्ता लिइएको छैन भन्दै उनले सर्वाेच्च अदालतको निर्णयपछि भने कुन मोडलमा एकताको सूत्र तयार गर्ने भन्ने यकीन हुने पनि बताए ।