ज्यानमारा भाइरसले लियो भारतका धावक मिल्खा सिंहको ज्यान

५ असार, एजेन्सी । ज्यानमारा भाइरसका कारण भारतका धावक मिल्खा सिंहको निधन भएको छ । कोरोना भाइरसको संक्रमण भएपछि उपचारमा रहेका उनको निधन भएको अमर उज्यालाले जनाएको छ ।

९१ वर्षका उनको चण्डीगढ अस्पतालमा उपचारका क्रममा निधन भएको समाचरमा उल्लेख गरिएको छ । उनलाई गएको मे २० तारिखमा कोरोनाको संक्रमणको पुष्टि भएको थियो ।

जुन ३ तारिखमा अस्पताल भर्ना भएका उनलाई जुन १३ तारिखसम्म आइसीयूमा राखिएको थियो । यसपछि गरिएको स्वास्थ्य परीक्षणमा उनको रिपोर्ट नेगेटिभ आएको थियो । तर, फेरि स्वास्थ्यमा समस्या देखिएपछि उनलाई आइसीयूमा भर्ना गरिएको थियो । उपचारकै क्रममा उनको मृत्यु भएको समाचारमा उल्लेख गरिएको छ ।

पाँच दिन अगाडि उनकी श्रीमतीको पनि कोरोनाका कारण ज्यान गएको थियो । सिंहले २ सय मिटर र ४ सय मिटर दौडमा धेरै पदकहरू जितेका छन् । सिंह स्वतन्त्र भारतका पहिलो धावक थिए जसले १९६० मा कमनवेल्थ गेम्समा स्वर्ण पदक जितेका थिए । उनी भारतीय सेनामा पनि थिए । भारतीय प्रधानमन्त्री नरेन्द्र मोदीले उनको निधनप्रति शोक व्यक्त गरेका छन् ।