यसै साता ओली–नेपालको संयुक्त वक्तब्य आउने सम्भावना !

५ असार, काठमाडौं । एमालेको विवाद एक हप्तामा मिलाउने भन्दै कस्सिएका दोस्रो पुस्तका नेताहरुले प्रधानमन्त्री केपी ओली र वरिष्ठ नेता माधवकुमार नेपाल दुवैलाई दबाब दिएका छन् । झलनाथ खनाल थप उपचार गर्न दिल्ली जाने दिन विज्ञप्ति जारी गरी विगतका सबै कुरा बिर्सिएर पार्टी एकता गर्न आह्वान गरेपछि संस्थापन पक्षमा उत्साह देखिएपनि माधव नेपाल भने पार्टीभित्रको आन्तरिक व्यवस्थापनमा ओलीले झेली गर्न सक्ने भन्दै एकताका लागि आनाकानी गरेपछि दुवै पक्षका युवा नेताहरुले दुवै नेतालाई दबाब दिएका हुन् ।

खनालको विज्ञप्तिसँगै माधव नेपाल समूहमाथि एकतका लागि दबावमा परेको नेपाल समूहले पार्टीभित्रै रहेर अन्तरसंघर्ष गर्ने स्पेसको खोजी गरिरहेको छ । पछिल्लो समय अध्यक्ष ओली र नेपाल समूहका दोस्रो तहका नेताहरु औपचारिक अनौपचारिक रुपमा छलफलमा छन् । उनीहरु पार्टीलाई जोखाउन दुवै पक्ष लचक हुनुपर्ने भन्दै सहमतिको प्रयासमा छन् ।

अध्यक्ष ओली पार्टीलाई जेठ ३ पूर्वको अवस्थामा फर्काउन तयार भएपछि माधव नेपालमाथि एकताका लागि झन दबाव बढेपनि ओलीले अल्मल्याउन खोजेको भन्दै त्यसलाई अस्वीकार गरेपछि अहिले दोस्रो तहका नेताहरुले माधव नेपालको उचित व्यवस्थापनसहितको एकता र सहकार्यको माध्यम खोजिरहेका छन् ।

नेपालमाथि पार्टी एकतका लागि दबाव बढ्दै गएपछि एमाले एकताको सम्भावना बढेर गएको बताइएको छ । आफ्नो समूहभित्र एकतका लागि तीव्र दबाव बढेपछि नेपाल समूहको बिहीबार स्थायी कमिटी बैठक बसेको थियो । उक्त बैठकले पार्टी एकताका लागि जेठ २ को अवस्थामा फर्किन तयार रहेको संकेत गरेपछि ओली समूहलाई जेठ २ फर्काउनु पर्ने दबाबमा परेको छ । नेपाल समूहको बैठकपछि जारी विज्ञप्तिमा जेठ २ पछि स्थायी कमिटीमा प्रवेश गरेका नेताहरूसमेत समेटिएपछि नेपाल समूह सकारात्मक रहेको संकेत मिलेको चर्चा हुन थालेको छ ।

माधव नेपालको एकल हस्ताक्षर रहेको विज्ञप्तिमा जेठ ३ पछि स्थायी कमिटीमा प्रवेश गरेका नेताहरूको पनि नाम छ। तत्कालीन समयमा नेकपा माओवादी केन्द्रसँग एकता हुँदा थप भएका बेदुराम भुसाल, रघुजी पन्त र प्रमेश हमालको नाम स्थायी कमिटी सदस्यमा राखेर विज्ञप्ति जारी भएको हो । हमाललाई पदेन स्थायी कमिटी सदस्य भनिएको छ ।

हमाल बाहेक दुई जना जेठ ३ पछि मात्रै कमिटीमा आएका हुन् । सो समयमा नयाँ स्थायी कमिटी सदस्य थप्दा ओली पक्षबाट रघुवीर महासेठ र विष्णु रिमाल स्थायी कमिटीमा प्रवेश गरेका थिए । यस्तै, माधव पक्षका बेदुराम भुसाल र रघुजी पन्त थिए । उनीहरुलाई पनि समेट्ने गरी विवाद मिलाउने कोसिस जारी रहेको छ ।

खासगरी नेपाल पक्षले नयाँ दल खोल्नेगरी विकल्पको बाटो हिँड्न खोजिरहेका बेला ओली सम्मुख केही संकट छन् । पहिलो त उनको सत्ता संकटमा परेको छ । दोस्रो, पार्टी विभाजनको अपजस आफ्नै टाउकोमा आउने र तेस्रो, ओलीसँगै रहन चाहनेका लागि पनि उपयुक्त बहानाको पनि उत्तिकै खाँचो रहेको छ । त्यसैले ओली बाध्य भएर जेठ २३ गते २०७५ जेठ ३ को अवस्थामा आइपुगेका हुन् । जस्तोसुकै अवस्था आएपनि एमालेको एकता कायम देख्न चाहनेका लागि भने उनी आफू हदैसम्म लचक बन्न तयार रहेको सन्देश दिन सफल भएका पनि नेपाल पक्षले त्यसलाई जालसाजीको रुपमा व्याख्या गरिदियो ।

उनले पार्टी एकताको मुख्य आधार पार्टीका स्थापित सिद्धान्त र नीति, विधि र पद्धति एवं मूल्य र मान्यता भएको उल्लेख गरेका छन् । ती मान्यताको खोजी गरिहिँडेको नेपाल समूहका लागि यो भन्दा राम्रो अवसर अर्को नहुन सक्छ । यदि ओलीले भनेजस्तै गर्ने हो भने एमाले एक रहने ठाउँ निर्माण भएको छ । ‘राष्ट्र, जनता र आन्दोलनको हितलाई केन्द्रबिन्दुमा राखेर असल मनशायले अगाडि बढ्ने हो भने हामीबीचका समस्याहरु समाधान हुन नसक्ने म कुनै कारण देख्दिन ।

त्यसका लागि सबैभन्दा पहिले हामी एक ठाउँमा उभिन जरुरी छ,’ उनले २३ गते जारी गरेको वक्तब्यमा भनेका छन् । एकताको लक्ष्य राखेर सकारात्मक र सिर्जनात्मक योगदान गर्न आवश्यक रहेको उनले औंल्याएका छन । एकताको पक्षमा निरन्तर पहल गर्नेहरुका भावना र सुझावलाई समेत ध्यानमा राखेर पार्टीभित्रका समस्या समाधान गर्न र पार्टी एकतालाई रक्षा एवं सुदृढ गर्न अघि सरेको उल्लेख गरेका छन । एमालेको आन्तरिक जीवनमा समस्या देखा पर्दा पार्टी पङ्ति मात्रै होइन, राजनीतिक स्थिरता र लोकतन्त्रका पक्षधर आम जनसमुदाय समेत चिन्तित भएको अवस्थामा ओलीले पार्टी मिलाउने भन्दा पनि अल्झाउने काम गरिरहेको कतिपयको गुनासो छ ।

अध्यक्ष ओलीले सबै संरचनाहरूलाई जेठ ३ अघिको अवस्थामा फर्काउन तयार भन्दै एकताको प्रस्ताव गरे पनि नेपाल समूहले अस्वीकार गरेको थियो। तर, अहिले आफ्नो पक्षका स्थायी कमिटीमा सोहीअनुसार काम कारबाही जारी राख्ने र एकताको प्रस्ताव अस्वीकार गर्ने प्रवृत्तिको उद्देश्य एकता नभई अरू नै भएको ओली पक्षको आरोप छ । नेपाल समूहको माग भनेको नवौँ महाधिवेशनबाट निर्वाचित कमिटीहरू सोहीअनुसार भए ग्यारेण्टी भए मात्रै एकता सम्भव हुने बताउँदै आएको छ ।

प्रभावशाली केही नेताहरू जसरी पनि एकता गर्नैपर्ने अडानमा रहेका कारण नेपाल स्वयं धर्मसंकटमा छन । विशेषगरी नेपाली कांग्रेसका सभापति शेरबहादुर देउवालाई प्रधानमन्त्री बनाउन माग गर्दै सर्वोच्च अदालतमा हस्ताक्षर बुझाएपछि नेपाल समूहलाई नैतिक संकट पनि परेको छ । एमालेका नेताहरु सुवास नेम्वाङ, विष्णु पौडेल, प्रदीप ज्ञावाली, सुरेन्द्र पाण्डे,घनश्याम भूषाल, गोकर्ण विष्ट, योगेश भट्टराई, भीम आचार्य पार्टी एकताको पक्षमा निरन्तर कुराकानी गरिरहेका छन् ।

उनीहरुले नै यसै साता भित्र पार्टी विवाद मिलाएर एकताबद्ध एमाले बनाउने घोषणा गर्न थालेका छन् । उनीहरुले माधव नेपाललाई पार्टीको कार्यकारी काम दिने गरी व्यवस्थापन गर्ने त्यही अनुरुप दुवै नेताहरुको संयुक्त वक्तब्य समेत सार्वजनिक हुने दावी गरिरहेका छन् ।