तीन लघुवित्तको शेयर लिलामी, कुनको कति ?

६ असार, काठमाडौं । एनआइसी एसिया बैंकले आज (असार ६ गते) देखि आफ्नो स्वामित्वमा रहेको आरएमडीसी लघुवित्त, मेरो माइक्रोफाइनान्स र महुली लघुवित्तको संस्थापक शेयर लिलामी बिक्री खुला गरेको छ । एनआइसीले आरएमडीसीको २ लाख ८६ हजार १९५, मेरोको ५९ हजार ६६८ र महुलीको ५५ हजार ५७० कित्ता शेयर लिलामीमा ल्याएको हो ।

जसमा लगानीकर्ताले आरएमडीसीको शेयरमा न्यूनतम ४७७ रुपैयाँ, मेरो माइक्रोफाइनान्सको शेयरमा ५७५ रुपैयाँ र महुलीको सेयरमा न्यूनतम ७६८ रुपैयाँ भाउ राखेर आवेदन दिन सक्नेछन् । यो शेयर खरिदका लागि विद्यमान संस्थापकहरु वा जो कोही व्यक्ति, कम्पनी, संघ, संस्थाहरुले आवेदन दिन सक्नेछन् ।

यसमा असार ११ गतेसम्म बोलपत्र पेश गर्न सकिनेछ । न्यूनतम १०० कित्ता वा अधिकतम सम्पूर्ण कित्ताका लागि पनि आवेदन दिन सकिनेछ । लिलामीको बोलपत्र बिक्री प्रबन्धक एनआइसी एसिया क्यापिटल, बबरमहल काठमाडौंमा बुझाउन सकिनेछ ।