मकैबाली नष्ट गर्ने अमेरिकी फौजी किराले किसान पीडित

७ असार, काठमाडौं । किसानलाई यति बेला मानो रोपेर मानो फुलाउने आसमा खेतमा धान रोप्न व्यस्त छन्, देशका धेरै जसो जमिनमा धान रोपिएको छ । अझै यो बर्षको मनसुनले पनि किसानलाई साथ दिएपछि धान रोप्न थप सहज भएको छ ।

तर खेतीपातिमै व्यस्त किसान पछिल्लो समय मकैबाली नष्ट गर्ने अमेरिकी फौजी किराले प्रकोपले पीडित भएका छन् । अहिले देशभरका ६४ जिल्लामा मकैबाली नष्ट गर्ने अमेरिकी फौजी किराको प्रकोप देखिएको छ ।

खेत र बारीको मकै बाली नष्ट गर्ने उक्त किराको प्रकोपबाट किसानहरु पीडित भइरहँदा नियन्त्रणकारी निकायले भने फौजी किराको आतंकविरुद्ध लड्न प्रशस्त सूचना र तथ्याङ्क अभाव भएको बताएका छन् ।

केही समयअघिसम्म खेतको मकैलाई क्षति पुर्‍याएको फैजी किरा अहिले देशभरको ६४ जिल्लामा फैलिएको जानकारी आएको प्लान्ट क्वरेन्टाइन तथा विषादी व्यवस्थापन केन्द्रले जनाएको छ ।

खेतको मकै उम्रिने बितिक्कै तथा डेढ फिट उचाइको हुँदा फौजी किराको आक्रमणमा परेको र अहिले सो प्रकोप बारीको मकैमा सल्किएको छ । कुन जिल्लामा कति मात्रामा यस्ता किरा फैलिएका छन र यसले पुर्‍याएको क्षति कति हो भन्ने कुनै अभिलेख आजसम्म तयार गर्न नसकिएको विभागको भनाइ छ ।

स्थानीय तहले प्रदेश र प्रदेशले केन्द्रलाई सूचाना पठाएपछि बल्ल महामारीविरुद्ध लड्ने एकीकृत योजना बनाउन सकिने भए पनि फैजी किराको केशमा त्यस्तो हुन नसकेको प्रवक्ता सुवेदीले बताए ।

मकै बाली नष्ट गर्ने अमेरिकी फौजी किराको फैलावट र क्षतिबारे कुनै विवरण प्राप्त नभएको संघिय कृषि तथा पशुपन्छी विकास मन्त्रालयले पनि जनाएको छ । फौजी किराको फैलावट व्यापक छ भन्ने जान्न यसका लागि प्रयोग हुने विषादीको आयात उच्च भएकोबाट अनुमान गर्न सकिने विषादी व्यवस्थापन केन्द्रले जनाएको छ ।