लुम्बिनी विल्डर्सले समयमै पुल निर्माणकाे काम नसक्दा आवत जावतमै समस्या

९ असार, वीरगञ्ज । पर्साको ग्रामिण क्षेत्रलाई सदरमुकाम वीरगञ्जसँग जोड्ने तिलाबे पुल निर्माण नहुँदा वर्षायाममा सदरमुकामसँग ग्रामिण क्षेत्रको सम्बन्ध टुट्ने देखिएको छ ।

निर्माणको जिम्मा लिएको लुम्बिनी विल्डर्सले समयमै काम नसक्दा ग्रामिण क्षेत्रको सम्बन्ध सदरमुकामसँग विच्छेद हुने अवस्था देखिएको हो ।पुलको ७० प्रतिशत काम सकिए पनि लकडाउनका कारणले निर्माणमा समस्या आएको भन्दै निर्माण कम्पनीले काम रोक्दा पुल निर्माणको काम अघि बढ्न सकेको छैन ।

पुलको स्लेब काम हुँदा पहिले सञ्चालनमा रहेको पुलबाट आवतजावत रोकेर डाइभर्सनको व्यवस्था मिलाइएको छ । तर पानी पर्दा डाइभर्सन हिलाम्मे हुने र तिलाबे खोलामा आउने बाढीका कारण आवत जावतमै समस्या हुने गरेको छ ।

करिब २० महिना अगाडी लुम्बिनी विल्डर्स र हुलाकी राजमार्ग आयोजनाबीच पुलको बाँकी काम अघि बढाउने दुईपक्षीय सम्झौता भएको थियो । पुल निर्माणका लागि २०७३ असारमा पप्पु लुम्बिनी जेभीले ठेक्का पाएको भए पनि पुलको काम लुम्बिनी विल्डरले गर्दै आएको छ ।

पछिल्लो पटक थपिएको म्याद अनुसार आउँदो असार सम्म पुल निर्माण गरिसक्नुपर्ने लक्ष्य दिइएको छ । लुम्बिनी विल्डर्सका कार्यकारी निर्देशक विष्णु शर्माले तिलाबे खोलाको पुल अब लकडाउन खुलेपछि मात्रै अघि बढ्ने बताए ।

साझा डेलीसँग कुरा गर्दै पुल निर्माणको जिम्मा लिएका उनले अहिले लकडाउनका बेला श्रमिक र निर्माण सामग्री उपलब्ध हुन नसक्दा पुल निर्माणको काम अघि बढाउन नसकेको बताए ।

वीरगञ्ज ठोरी हुलाकी सडक खण्डमा पर्ने यो पुल ग्रामिण क्षेत्रलाई सदरमुकामसँग जोड्ने एक मात्रै पुल हो । हुलाकी राजमार्ग आयोजनाका दरोगा प्रसाद साहले लकडाउन नभएको भए पुल देखिने गरि निर्माण हुने अवस्था रहेको बताउँदै अहिले अवस्था केही सहज भएकाले केही समयमै काम सुरु हुने विश्वास व्यक्त गरे ।

साथै वर्षायाममा सडकबाट पूलबाट ओहरदोहर सहज बनाउने गरी सडक सुधार गर्न निर्माण कम्पनीलाई निर्देशन दिएको उनले जानकरी दिए ।