धारा ७६ (४) फेस नगर्नेले प्रममा दाबी गर्न नमिल्ने कार्कीको तर्क

९ असार, काठमाडौं । वरिष्ठ अधिवक्ता बद्रीबहादुर कार्कीले प्रतिनिधिसभामा विश्वासको मत फेस नगरेको प्रधानमन्त्रीले संविधानको धारा ७६ (५) मा दाबी गर्न नपाउने तर्क गरेका छन् ।

सर्वाेच्च अदालतको संवैधानिक इजलाशमा आज निवेदकका तर्फबाट वहस गर्दै कार्कीले भने –संसद्मा विश्वास गुमाएको प्रधानमन्त्रीले राजीनामा नदिइ अर्काे प्रकृयामा भाग लिनै पाउँदैन । त्यसैले संविधानको धारा ७६ (३) को प्रधानमन्त्री ७६(४) मा प्रवेश नगरी ७६ (५)मा दाबी गर्न पाउने कुरै भएन ।

प्रधानमन्त्री पद खेलाँची नभएको तर्क गर्दै उनले राजीनामा नगरी प्रधानमन्त्री पद खाली नै हुँदैन , अनि मार्ग प्रशस्त गरें भन्नुको कुनै तुक हुन्छ? उनको प्रश्न थियो । हाउस पनि फेस नगर्ने राजीनामा पनि नदिने , लोकतन्त्रमा यो स्वीकार्य हुँदैन – उनले भने ।

आज पाँच जना कानून व्यावसायीले वहस गर्ने तालिका रहेको छ । यसअघि गोबिन्द बन्दी, खम्बराज खाती, महादेव यादवले वहस गरिसकेका छन् ।