ओली र नेपालबीच भेट गराउन रावल सक्रिय

८ साउन, काठमाडौं । प्रमुख प्रतिपक्षी दल नेकपा एमालेभित्रको अन्तद्र्वन्द्व अन्त्य गर्न दोस्रो तहका नेताहरुको सक्रियता बढेपनि ठोस प्रगति भने भएको छैन ।

पार्टी भित्रको संरचना र शक्तिको आँकलन गरेका पार्टी अध्यक्ष केपी ओली हिजो अचानक यू टर्न भएपनि असन्तुष्ट पक्षका नेता माधवकुमार नेपाल भने आश्वस्त हुन सकिरहेका छैनन् । त्यसैले हिजो साँझका लागि दुई नेताबीच वार्ता गराउने दोस्रो तहका नेताको प्रयास सफल हुन सकेन ।

हिजोको केन्द्रीय कमिटी बैठकपछि ओली र नेपालबीच वार्ता गराउन भीम रावल, सुभाषचन्द्र नेम्बाङ लगायत नेताहरु सक्रिय थिए । तर ओलीले दिएको एउटा अभिव्यक्तिले फेरि भाँडिएको हो । हिजो ओलीले पुष्पलाल स्मृति दिवसमा आयोजित एक कार्यक्रममा नेता नेपाललगायत ३३ जना नेतालाई अपराध गरेपनि क्षमादान गरें भन्ने वाक्यले सबै भताभुंग भएको बुझिएको छ ।

एमाले सचिव भीम आचार्यका अनुसार, ओलीले अरुलाई अपराधी जस्तो हुन् भन्ने आसयले यस्ता शव्दावलि प्रयोग गरेकाले दुई नेताबीचको वार्ता भाँडिएको हो । पार्टी अध्यक्ष ओलीले पनि अक्षम्य अपराध गरेकाले अरुले पनि क्षमादान दिनुपर्ने अवस्था आउन सक्ने उनले बताए ।

हिजोको वार्ता भाँडिएपनि आज भने हुन सक्ने उनले जानकारी दिए । ओली वार्ताका लागि तयार रहेपनि नेता नेपाल भने अझै द्विविधामा रहेका छन् । यस्तै अर्का नेता नेम्बाङ पनि आज दुई नेताबीच निर्णायक वार्ता हुन सक्ने बताउँछन् । अब सबैले गुमाउने जति गुमाइसकेकाले नयाँ प्राप्तिका लागि मात्रै भएपनि मिल्नुको विकल्प नरहेको उनले बताए ।

देशै भरिका पार्टी नेता कार्यकर्ताको भावना विपरित ओली र नेपाल जान नसक्ने भन्दै उनले अब एकताको विकल्प नरहेको बताए । आज साँझसम्म नेताहरुले अवश्य पनि भेटघाट गर्नु हुने छ – उनले भने । नेताद्वय नमिलेसम्म पार्टी एकताले सार्थकता नपाउने भएकाले विकल्प छैन – नेम्बाङले भने ।

आजका लागि भेट वार्ता गराउन भीम रावल बढी सकृय छन् । बिहानै बालकोट पुगेर उनले ओलीसँग छलफल गरे । लगत्तै उनी कोटेश्वरस्थित नेपाल निवास गएका थिए । ओली तत्काल वार्ताका लागि तयार छन् । तर नेपाल भने अझै द्विविधामै रहेका छन् । आज रावलसँगको भेटमा पनि नेपालले प्रष्ट रुपमा आफ्ना धारणा राखेका छैनन् । यद्यपि उनले भेट गर्ने प्रस्तावलाई भने अस्वीकार गरेनन् ।

ओलीले बालुवाटार छाडेर बालकोटस्थित आफ्नो निवासको वार्दलीबाट नेता नेपाललाई गद्धार घोषित गरेपछि उनको मन अझै कुँढिएको छ ।