कांग्रेस नेता पौडेल प्रचण्ड निवासमा

११ साउन, काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्ड दोहरो तनावमा छन् । देशका राजनीतिको केन्द्रविन्दूमा रहेका प्रचण्ड घरयासी समस्याले समेत पिरोलिएका छन् ।

राजनीतिक क्षेत्रका कुटिल खेलाडी भएपनि अहिले उनलाई सांसद्हरुलाई मन्त्री बनाउने तनावले सताएकै छ । साथै, घरमा पत्नी सीताको रोगले उनी अझै गलेका छन् ।

सीता लामो समयदेखि रोगले थलिएकी छन् ।प्रचण्डको घरेलुु समस्याप्रति नेताहरुले सहानुभूति देखाउने क्रम ह्वात्तै बढेको छ । आज मात्रै नेपाली कांग्रेसका वरिष्ठ नेता रामचन्द्र पौडेल खुमलटारस्थित प्रचण्ड निवास पुगेका छन् ।

नेता पौडेलले प्रचण्डसँग समसामयिक राजनीतिबारे छलफल मात्र गरेनन्, प्रचण्डपत्नी सीताको स्वास्थ अवस्थाबारे समेत जानकारी लिए ।पौडेलले बिरामी अवस्थामा रहेकी सीतासँग भेटघाट समेत गरेका छन् । भेटका अवसरमा नेता पौडेलले सीताको सुुस्वास्थको कामना गरेका छन् ।यसअघि प्रधानमन्त्री शेरबहादुर देउवा पनि गएको बुधबार प्रचण्ड निवास पुगी सीताको स्वास्थ अवस्थाबारे जानकारी लिएका थिए ।