आर्कषक मन्त्रालयको सचिव हत्याउन दौडधुप तीव्र, ६० सचिवको सरुवा तयारी

१२ साउन, काठमाडौं । सरकार परिवर्तनसँगै महत्वपूर्ण र आर्कषक मन्त्रालयहरुमा सचिव बन्न सरुवा माग्नेहरुको दौडधुप चलेको छ । अघिल्लो सरकारमा पेलानमा परेका र अवसर नपाएहरुले यसपटक सबैभन्दा आकर्षक मानिने अर्थ सचिव , गृहसचिव, राजश्व सचिवको रुपमा जान दौडधुप गरिरहेका छन् ।

हाल रहेका सचिवहरुको अवधि सकिन लागेको तथा सरकारसमेत परिवर्तन भएकाले कम्तीमा ६० सचिवको सरुवा तयारी भइरहेको छ । प्रधानमन्त्री शेरबहादुर देउवाले सत्ता सहयात्री दलका प्रमुख नेतासँग एकलट छलफल गरेर मात्रै सरुवा सूची बनाउने बताएपछि रोकिएको सरुवाको लिस्टले अझै पूर्णता पाउन सकेको छैन । अधिकांश सचिवको आँखा गृह र अर्थ तथा राजश्व त्यसपछि सञ्चार, उद्योग र शहरी विकास र भौतिकमा परेको छ ।

गृहसचिव बन्ने दौडमा सचिव अर्जुन पोखरेलदेखि भर्खरै मात्रै बढुवा भएका सचिव कृष्णहरि पुष्कर तथा रामकृष्ण सुवेदी, एकनारायण अर्याल, अर्थ सचिवको दौडमा मधु मरासैनी, बैकुण्ठ अर्याल, रामकृष्ण सुवेदी, लक्ष्मण अर्याल, केवलप्रसाद भण्डारीसम्म लागेका छन् । उनीहरुमध्ये केहीले सके अर्थ सचिव नभए राजस्व सचिवमा समेत लविङ गरिरहेका छन् ।

अर्थमन्त्रालय माओवादी भागमा परेकाले माओवादी नेताहरुसँग निकट रहेका सुवेदीले समेत अर्थसचिवमा तीव्र लविङ गरिरहेका छन् । उनलाई ओली सरकारले पेलेर २ नम्बर प्रदेश र सुदुरपश्चिम प्रदेशको मुख्यसचिवको रुपमा डेढ वर्ष थन्काएकाले उनी यसपटक आकर्षक मन्त्रालय पाउने आशामा छन् । उनी यसअघि गृहमन्त्रालयको सहसिचवमा बसेर काम गरेको हुनाले गृहमा पनि जान चाहिरहेका छन् ।

त्यसो त गृहसचिव महेश्वर न्यौपानेसमेत आफ्नो पद थामौती गर्ने दौडमा लागेका छन् । आफू निकटकालाई प्रधानमन्त्री देउवासँग आफ्नो राम्रो सम्बन्ध रहेको तथा जोखिम मोलेर ओली सरकारका पालामा पछिल्लो समय देउवालाई आफूले भित्री सहयोग गरेकाले देउवाले आफैलाई निरन्तरता दिने दावी गर्दै आएका छन् । उनी अघिल्लो सरकारको पालामा महेश बस्नेतको पावरले १७ महिना गृहमै बस्न सफल भएका थिए । त्यसअघि अख्तियारमा रहेका थिए ।

त्यस्तै अर्थ सचिव शिशिर ढुंगानाले समेत पदमा टिकिरहन अर्थमन्त्री जनार्दन शर्मालाई रिझाउन अनेक प्रयास गरीरहेको स्रोतले बतायो । उनी अलि अटेरी सचिव भएकाले शर्माले उनको सरुवा चाहिरहेका छन् । उनी अर्थबाट सरुवा भएमा राजश्व सचिवमा थमौति हुने संभावना रहेको छ ।

यसअघि गृहमा सहसचिवहरुको सरुवा भैसकेको छ । मन्त्रालयको प्रवक्तामा फणिन्द्रमणि पोखरेल आएका छन् भने कर्मचारी प्रशासनमा गोविन्द रिजाल र कारागार व्यवस्थापन विभागमा जनकराज दाहाल सरुवा भएका छन् । यसबीच २० वटा भन्दा जिल्ला प्रशासन कार्यालयका प्रमुखहरुको सरुवा सूची तयार भैरहेको मन्त्रालय स्रोतले जनाएको छ ।