ओलीले आयोजना गरेको खीर खाने कार्यक्रममा नेपाल समुह नजाने

१५ साउन, काठमाडौं । आज साउन १५ अर्थात खीर खाने दिन। तीज, श्राद्ध, देवाली, ब्रतबन्ध, भोजभतेर जस्ता शुभ अवसरमा विशेष परिकारका रूपमा पकाइने गरिएको खीरलाई स्वादिष्ट एवम् स्वास्थ्यवर्दक खानाको रूपमा लिइन्छ।

शुद्ध, स्वास्थ्यवर्दक तथा खान सहज भएकै कारण बच्चाको अन्न खुवाई सुरुवात समेत खीर खान लगाएर गरिने प्रचलन छ।

यता नेकपा एमालेको केपी ओली समूहले आज पार्टी कार्यालय थापाथलीमा खीर खाने कार्यक्रम गरेकाे छ । खीर खाने कार्यक्रममा पार्टीका वरिष्ठ नेता माधवकुमार नेपाल समूहलाई भने बोलाइएको छैन ।

ओली समुहले आयोजना गरिएको खिर खाने कार्यक्रममा पार्टीका सबै नेताहरुलाई खीर खान निम्तो गरेको बताएपनि नेपाल पक्षले भने अहिलेसम्म निम्तो नआएको जनाएको छ ।

नेपाल समूहका कुनैपनि नेता पार्टी कार्यालयमा खीर खाने कार्यक्रममा सहभागी नहुने भएका छन् । प्रधानमन्त्रीबाट हटेपछि एमाले अध्यक्ष ओली नियमित रुपमा पार्टी कार्यालय जान थालेका छन् भने पार्टी गतिविधिमा पनि सक्रियता जनाउन थालेका छन् ।