मध्य भोटेकोशी जलविद्युतको आईपीओ बाँडफाँड कहिले ?

१० असोज, काठमाडौं । मध्य भोटेकोशी जलविद्युत् कम्पनी लिमिटेडले आयोजना प्रभावित स्थानियमा विक्री गरेको आईपीओ सोमवार बाँडफाँड गर्ने भएको छ ।
उक्त आईपीओ भोलि सोमवार बिहान ९ बजे आईपीओ बाँडफाँड गरिने बिक्री प्रबन्धकले जनाएको छ ।

कम्पनीले गत साउन ५ गतेदेखि ३२ गतेसम्म स्थानियका लागि आईपीओ विक्री गरेको थियो ।कम्पनीले आयोजना प्रभावित सिन्धुपाल्चोक जिल्लाको भोटेकोशी गाउँपालिका वडा नं। १ र ५ (साविक लिस्ती र मार्मिङ गा.वि.स), बाह्रबिसे नगरपालिका वडा नं. ५ र ६ (साविक गाती गा.वि.स) तथा बाह्रबिसे नगरपालिका वडा नं ७ र ८ (साविक घुम्थाङ्ग र मानेश्वरा गा.वि.स) मा स्थायी बसोबास गर्ने बासिन्दा तथा आयोजनाबाट प्रभावित क्षेत्र बाहेक सिन्धुपाल्चोक जिल्लाका अन्य क्षेत्रमा स्थायी बसोबास गर्ने बासिन्दाहरु समेतको लागि कुल ६० लाख कित्ता आईपीओ विक्री गरेको हो ।

यसअघि वैशाख २१ गते गतेदेखि आईपीओ विक्री खुला गरेको कम्पनीले त्यस क्षेत्रमा निषेधाज्ञा भएपछि वैशाख २४ गतेदेखि विक्री कार्य स्थगित गरेको थियो । उक्त शेयर अवस्था सामान्य भएसँगै कम्पनीले पुनः विक्री गरेको हो ।

कम्पनीले कुल कित्तामध्ये आयोजना क्षेत्रका सिन्धुपाल्चोक जिल्लाको स्थायिनका लागि १८ लाख कित्ता र सोही जिल्लाका अन्य वासिन्दाका लागि ४२ लाख कित्ता आईपीओ विक्री गरेको हो ।

स्थानियबाट यो आईपीओ खरीदका लागि १ लाख १ हजार २८ जनाबाट  १ अर्ब ९३ करोड २५ लाख ७८ हजार बराबरको १ करोड ९३ लाख २५ हजार ७८० कित्ताको लागि आवेदन परेको विक्री प्रबन्धकको भनाइ छ ।

आयोजना प्रभावित १० हजार ८४८ जना आवेदकबाट २६ लाख ७५ हजार ४९६ कित्ताको लागि र अन्य जिल्लाबासीहरु ९० हजा १८० आवेदकहरुबाट १ करोड ६६ लाख ५० हजार २८४ कित्ताको लागि आवेदन परेको विक्री प्रबन्धकले जानकारी दिएको हो । जुन मागभन्दा ३ दशमलव २२ गुणा बढी हुन आउँछ ।

सर्वसाधारणका लागि रू। १ अर्ब ५० करोड बराबरको आईपीओ विक्री गर्न वैशाख ५ गतेनै धितोपत्र बोर्डबाट अनुमति पाएको कम्पनीले पहिलो चरणमा १० प्रतिशत शेयर स्थानियमा वितरण गर्न लागेको हो ।

यस पछि दोस्रो चरणमा १५ प्रतिशतका दरले रू। ९० करोड बराबरको ९० लाख कित्ता शेयर कम्पनीले आम सर्वसाधारणमा विक्री गर्नेछ । यस अघि कम्पनीले कर्मचारी सञ्चय कोषका सञ्चयकर्ता, संस्थापक कम्पनी तथा ऋणदाता कम्पनीका कर्मचारीहरुका लागि १ करोड ४४ लाख कित्ता आईपीओ विक्री गरिसकेको छ । हाल कम्पनीको चुक्तापूँजी रू। ४ अर्ब ५० करोड रहेको छ ।

सर्वसाधारणमा आईपीओ जारी गरेपश्चात कम्पनीको चुक्तापूँजी रू। ६ अर्ब पुग्नेछ । उक्त कम्पनीले सिन्धुपाल्चोक जिल्लामा १०२ मेगावाट क्षमताको मध्यभोटेकोशी जलविद्युत् आयोजना निर्माण गरिरहेको छ ।