विश्व इतिहासमा आजः पूर्वी टिमोर स्वतन्त्रतादेखि तेहरान सम्मेलन

आज २८ नोभेम्बर । विश्व इतिहासमा आज विभिन्न सामाजिक तथा राजनीतिक घटनाक्रम विकसित भएका थिए । प्रस्तुत छ इतिहासमा आज भएका केही घटनाः

गणतन्त्र दक्षिण ओसेटिया घोषणा

सन् १९९१ मा जर्जियाको विवादास्पद क्षेत्र ओसेटियाले आफूलाई गणतन्त्र दक्षिण ओसेटिया घोषणा गरेको थियो । ओसेटियाको स्वतन्त्रतालाई जर्जियाले मान्यता नदिएपछि दक्षिण ओसेटियामा युद्ध भएको थियो । रसिया भेनेजुएलालगायात केही देशहरुले मात्र दक्षिण ओसेटियालाई सार्वभौम देशको मान्यता दिएका छन् ।

पूर्वी टिमोर स्वतन्त्रता

सन् १९७५ मा पूर्वी टिमोर स्वतन्त्र भएको थियो । पूर्वी टिमोर लामो समयदेखि पोर्चुगलको अधीनमा थियो ।

मंगल ग्रहमा नासाको यान

सन १९६४ मा अमेरिकी अन्तरिक्ष निकाय नासाले मंगलग्रहमा म्यारिनर ४ नामक यान पठाएको थियो । मंगल ग्रहबाट तस्विर खिचेर पृथ्वीमा पठाउने यो पहिलो यान हो ।

तेहरानबारे सम्मेलन

सन् १९४३ मा अमेरिका, बेलायत र सोभियत युनियनबीच इरानको राजधानी तेहरानस्थित सोभियत दूतावासमा तेहरान सम्मेलन सम्पन्न भएको थियो । सम्मेलनले युरोप र एसियासँग कूटनीतिक कदम चाल्ने विषयमा छलफल भएको थियो । सम्मेलनमा दोस्रो विश्वयुद्धको समयमा जर्मनविरुद्ध दोस्रो मोर्चा बनाउने बारेमा योजना गरिएको थियो ।