आईपीओ निष्कासन गर्ने तयारीमा रहेको उपकार लघुवित्तको कस्तो छ वित्तीय अवस्था ?

१३ माघ, काठमाडौं । उपकार लघुवित्त वित्तीय संस्थाले चालू आवको दोस्रो त्रैमासिक वित्तीय विवरण सार्वजनिक गरेको छ ।

उक्त वित्तीय विवरण अनुसार कम्पनीको मुनाफा गिरावट आएको छ । कम्पनीले गत आवको दोस्रो त्रैमाससम्ममा ३ करोड ९३ लाख मुनाफा कमाएकोमा चालू आवको सोही अवधिमा घटेर १ करोड ८८ लाखमा झरेको हो । जुन गत आवको तुलनामा ५२ प्रतिशत कम हो ।

त्यसैगरी, कम्पनीको सञ्चालन नाफा गत आवमा  ३४ करोड ११ लाख ऋणात्मक रहेकोमा चालू आवको सोही अवधिमा २ करोड २६ लाख धनात्मक भएको हो । त्यसैगरी कम्पनीको खुद ब्याज आम्दानी गत आवको दोस्रो त्रैमासको तुलनामा चालू आवको सोही अवधिमा ७ प्रतिशत वृद्धि भएको छ ।

गत आवको दोस्रो त्रैमासमा कम्पनीको खुद ब्याज आम्दानी ६ करोड १६ लाख रहेकोमा चालू आवको सोही अवधिमा बढेर ६ करोड ६० लाख पुगेको हो । चालू आवको दोस्रो त्रैमाससम्ममा कम्पनीले  ९५ करोड ६९ लाख सापटी लिएर, ८९ करोड ८७ लाख निक्षेप संकलन गरेर २ अर्ब १३ करोडभन्दा बढी कर्जा लगानी गरेको छ ।

साथै, कम्पनीले आईपीओ निष्कासन गर्ने तयारीमा पनि रहेको छ । कम्पनीले २ लाख ६६ हजार २५० कित्ता आईपीओ निष्कासन गर्ने तयारीमा रहेको हो । उक्त आईपीओ निष्कासन गर्नका लागि नियामक निकाय नेपाल धितोपत्र बोर्डमा निवेदन दिइसकेको छ ।

विक्री प्रबन्धक नेपाल एसबिआइ मर्चेण्ट बैंकिङ लिमिटेड रहेको छ । बोर्डबाट स्वीकृति पाएपछि मात्र कम्पनीले आईपीओ निष्कासन गर्नेछ ।