राष्ट्र उत्थान लघुवित्तको आईपीओमा आइतबारसम्म आवेदन दिन सकिने ?

६ फागुन, काठमाडौं । राष्ट्र उत्थान लघुवित्तले आईपीओ बिक्री खुल्ला गरेको छ । कम्पनीले फागुन ४ गतेदेखि आईपीओ बिक्रीमा ल्याएको हो । कम्पनीले बिक्रीमा ल्याएको आईपीओमा आइतबार अर्थात फागुन ८ गतेसम्म आवेदन दिन सकिने भएको छ । लघुवित्तले ८ करोड ५० लाख रुपैयाँ बराबरको ८ लाख ५० हजार कित्ता आईपीओ निष्कासनमा गरेको छ ।

लघुवित्तले निष्काशन गर्न लागेको कुल ८ लाख ५० हजार कित्ता शेयरमध्ये ०.५ प्रतिशत अर्थात १३ हजार कित्ता कर्मचारीहरुलाई र ५ प्रतिशत अर्थात ४२ हजार ५०० कित्ता सामूहिक लगानी कोषहरुलाई सुरक्षित गरिएको छ। सर्वसाधारणले बाँकी ७ लाख ९४ हजार ५०० कित्ता शेयरका लागि आवेदन दिन सक्नेछन्।

कम्पनीले सानो संख्यामा आईपीओ निष्कासन गर्ने भएकाले सर्वसाधारण लगानीकर्ता १० कित्ता भर्दा पुग्ने देखिन्छ ।

आईपीओ निष्काशन तथा बिक्री प्रवन्धक एनआईबिएल एस क्यापिटल लिमिटेड रहेको छ। इच्छुक आवेदकले सि–आस्वा सदस्य बैंक तथा वित्तीय संस्था र मेरोशेयर वेबसाइट तथा एप मार्फत आवेदन दिन सक्नेछन्।

आईपीओ निष्काशनका लागि गराएको क्रेडिट रेटिङ्गमा इक्रा रेटिङ्ग नेपालले लघुवित्तलाई इक्रा एनपी आईआर डबल बि रेटिङ्ग प्रदान गरेको छ। यसले समयमै वित्तीय दायित्व पुरा गर्न सक्ने सम्बन्धमा मध्यम जोखिम रहेको संकेत गर्दछ।

हाल लघुवित्तको चुक्ता पूँजी १७ करोड ५० लाख रुपैयाँ छ। आईपीओ बाँडफाँटपश्चात लघुवित्तको चुक्ता पूँजी २६ करोड पुग्नेछ।