गठबन्धनका घटकबाट हामीलाई राम्रो सहयोग भएन, यसको गम्भिर समीक्षा हुन्छः अध्यक्ष नेपाल

३ जेठ, काठमाडौं । नेकपा एकीकृत समाजवादीका अध्यक्ष माधवकुमार नेपालले स्थानीय तहको निर्वाचनमा गठबन्धनका दलहरुबाट आफ्नो पार्टीका उम्मेदवारले अपेक्षित सहयोग नपाएको बताएका छन् । उनले गठबन्धन घटकबाट सहयोग नभएका कारण अपेक्षित परिणाम ल्याउन नसकेको बताएका छन् ।

मंगलबार पार्टी कार्यालयमा आयोजित मदन–आश्रित स्मृति दिवसको कार्यक्रममा सम्बोधन गर्दै गठबन्धनका घटकबाट पनि राम्रो सहकार्य नपाएको टिप्पणी गरेका हुन् । उनले अहिलेसम्मको निर्वाचन परिणाम आफ्नो पार्टीले प्राप्त गर्ने जति नभएको दावी गरेका छन् ।

नेपालले नेकपा एकिकृत समाजवादीसँग गठबन्धन दलका घटकहरुले राम्ररी सहकार्य गर्न नचाहेको भन्दै यसको गम्भिर समीक्षा हुने बताए । उनले निर्वाचन र गठबन्धनबीच सहकार्यको गम्भीर समीक्षा आफूले गर्ने बताए ।

उनले भने, ‘हामी निर्वाचनको पनि गम्भीर समीक्षा गर्ने छौं,’ उनको भनाइ छ, ‘हामीले गठबन्धन कार्यको पनि समीक्षा गर्नेछौं । समीक्षा गरेर हामीले कहाँ राम्रो गर्यौं, कहाँ त्रुटि गर्यौं त्यसको समीक्षा गर्ने छौं ।’

परिणाम जेसुकै आए पनि पार्टीलाई जनताको बीचमा बलियो बनाउनुपर्ने, बलियो जगमा उभ्याउनुपर्ने र जनताको बीचमा क्रियाशील बनाउँदै जनताको प्यारो पार्टीका रुपमा अगाडि बढाउनुपर्ने उनले बताए । नेपालले गठबन्धन दलकाबीचमा पनि स्थानीय तह निर्वाचनको समीक्षा गरी आगामी रणनीति तयार गर्ने बताए ।