साफ यू-१५ महिला च्याम्पियनसिपको उपाधि नेपाललाई

२२ कात्तिक, काठमाडौं । नेपालले साफ यू–१५ महिला च्याम्पियनसिपको उपाधि हात पारेको छ । डवल राउन्ड रोविन लिगको अन्तिम खेलमा शुक्रबार ढाकास्थित बीएसएसएसएमके स्टेडियममा घरेलु टोली बंगलादेशलाई १–१ गोलको बराबरीमा रोक्दै नेपालले पहिलोपटक उपाधि हात पारेको हो । नेपालका लागि सुशिला केसीले गोल गरेकी हुन् ।

पहिलो हाफमै १–० ले अग्रता लिएको नेपालले दोस्रो हाफमा अग्रता जोगाउन भने सकेन। खेलको १४ औं मिनेटमा केसीले गोल गर्दै नेपाललाई सुरूआती अग्रता दिलाएकी थिइन्। प्रतियोगितामा अपराजित नेपालले चार खेलबाट ३ जित र एक बराबरीसहित १० अंक जोडेको छ।

आयोजक बंगलादेश २ जित र १ बराबरीसहित सात अंकमा सीमित रहदै दोस्रो स्थानमा रह्याे भने तीन टिम सम्मिलित प्रतियोगितामा भुटान अंकविहीन अवस्थामा सीमित हुन पुग्यो ।