मतगणना रोकिएका क्षेत्रमा ओली र निर्वाचन आयोगबीच चलखेल सुरु

१२ मंसिर, काठमाडौं । मंसिर ४ मा भएको प्रदेश र प्रतिनिधिसभा सदस्य निर्वाचनका क्रममा सामान्य विवादका कारण मतगणना रोकिएका क्षेत्रमा पुनः मतदान गराउने विषयमा निर्वाचन आयोग र नेकपा एमालेका अध्यक्ष केपी शर्मा ओलीबीच गोप्य छलफल चलेको समाचार छ । अध्यक्ष ओलीले निर्वाचन आयोगका प्रमुख आयुक्त दिनेशकुमार थपलियालाई यी क्षेत्रमा पुनः मतदान गराउन दवाव दिइरहेको आयोग स्रोतको भनाइ छ ।

अध्यक्ष ओलीले आयोगलाई दवाव दिएर स्याङजा क्षेत्र नम्बर २ को विवाद मिलाउन पठाएको टोलीलाई समेत सहमति गराउन नदिएर फिर्ता बोलाउन लगाएका थिए । आयोग स्रोतका अनुसार स्याङजा पुगेको सहसचिव नेतृत्वको टोली काठमाडौं फर्किएर रिपोर्ट बुझाउने र उक्त रिपोर्टका आधारमा आयोगले निर्णय लिने तयारी गरेको छ । ओलीको दवावपछि उक्त टोली आइबार काठमाडौं आइपुगेको स्रोतको भनाइ छ ।

स्याङजा क्षेत्र नम्बर २ को अवस्था बुझेर सबै पक्षलाई सहमतिमा ल्याई मतगणना गराएर फर्किने जिम्मेवारी लिएर उक्त टोली स्याङजा गएको थियो । निर्वाचन आयोगका सहसचिव फणिन्द्र गौतमको नेतृत्वमा गएको टोलीले स्याङजा पुगेर छानविन गरी फर्किएको बताइएको छ । स्याङजा गएका सहसचिव गौतम वर्तमान राष्ट्रपति बिद्यादेवी भण्डारी तत्कालिन समयमा मन्त्री रहँदा उनका स्वकीय सचिवका रुपमा कार्यरत रहेको बताइन्छ ।

उनको नेतृत्वमा गएको टोलीले सोमबार रिपोर्ट बुझाउँदैछ । उनी एमाले निकट कर्मचारी भएको भन्दै स्याङजा कांग्रेसले उनले बुझाएको प्रतिवेदनलाई आधार मानेर आयोगले निर्णय गर्न नमिल्ने बताएको छ । स्याङजा कांग्रेस जिल्ला कार्यसमितिले एक प्रेस विज्ञप्ती सार्वजनिक गर्दै यथाशीघ्र मतगणना सुरु गर्न माग गरेको छ । उसले स्याङजा क्षेत्र नम्बर २ का विभिन्न बुथहरुमा एमाले कार्यकर्ताले आफ्ना कार्यकर्तामाथि निर्घात हमला गरेको जनाएको छ ।

जिल्ला कार्यसमितिका कार्यबहाक सभापति केदार काफ्ले हस्ताक्षर गरी निर्वाचन आयोगलाई लेखेको पत्रमा मतदान निष्पक्ष र शान्तिपूर्ण रुपमा भइरहेका बेला एमाले कार्यकर्ताले कांग्रेसका क्षेत्रीय सभापति दीलिपप्रताप खाँण,चापाकोट बुथमा कार्यरत भरत ओस्थी, कालिगण्डकी ६ का अगुवा कार्यकर्ता दलबहादुर सिंजापतिलगायतलाई कुटपिट गरेको जनाएको छ । यसरी एमाले आफैले आतंक सिर्जना गर्ने र कांग्रेसमाथि बुथ कब्जा गरेको आरोप लगाउँदै पुनः मतदानको माग गरिरहनु गलत भएको सो विज्ञप्तिमा उल्लेख छ ।

आयोग स्रोतका अनुसार ओलीको पुनः चुनाव गराउनुपर्ने दवाव आएपछि के गर्ने भन्ने विषयमा पाँच आयुक्तबीचमा नै कुरा मिलेको छैन् । प्रमुख आयुक्तसहित निर्वाचन आयोगभित्र ओलीका पक्षमा बहुमत छ । अध्यक्ष ओलीले दिएको दवावमा निर्वाचन आयुक्त ईश्वरीप्रसाद पौड्यालले मात्रै फरकमत राखेको स्रोतको भनाइ छ । यता, बारम्बार प्रश्न उठेपछि निर्वाचन आयोगले यही मंसिर ४ मा मतदान सम्पन्न भएका बाजुरा र स्याङ्जामा मतगणनाका विषयमा छिट्टै निर्णय लिने आइतबारको पत्रकार सम्मेलनमा जानकारी दिएको छ ।

तीन जिल्लाबाट तीन थरिकै निर्वाचन अधिकृतहरुको राय आएकाले आयोगभित्र पौड्यालको फरक मतले खासै अर्थ नराख्ने स्रोत बताउँछ । स्रोतको भनाइमा फरक यति छ की दोलखाका मुख्य निर्वाचन अधिकृतले पुन मतदान गराउनु पर्ने राय लेखी पठाएका छन् भने स्याङ्जाका मुख्य निर्वाचन अधिकृतले पुन निर्वाचन गराउन आवश्यक नरहेको राय लेखी पठाएका छन् । तर, प्रमुख आयुक्तलाई ओलीको दवाव भने निर्वाचन गराउनुपर्ने मै केन्द्रित रहेको बताइएको छ ।

आयूक्त ईश्वरीप्रसाद पौड्यालले छानविन टोली पठाउनु अघि नै निर्वाचन आयोगको बैठकमा फरकमत राखेपनि आयूक्तहरुको बहुमतको आधारमा टोली स्याङजा पठाइएको हो । निर्वाचन आयोगमा अहिले भएका ५ जना आयूक्त मध्ये उनी मात्रै स्याङजाको विषयमा बोलिरहेको स्रोतको भनाई छ । आयुक्त पौड्याल स्याङ्जा कै भएकाले पनि दवाव छ । उनलाई गोपालमान श्रेष्ठको सिफारिसमा करिब ६ बर्ष अघि आयुक्त बनाइएको थियो ।

सोमबारसम्ममा छानविन टोलीका संयोजक सहसचिव फणिन्द्र गौतमको टोलीले राय दिने र सोमबार साँझसम्ममा स्याङजाका विषयमा निर्णय आउने सम्भावना औल्याइएको छ । सहसचिव गौतम राष्ट्रपति बिद्यादेवी भण्डारीका पूर्वस्वकीय सचिव रहनु र केपी ओलीले प्रमुख निर्वाचन आयूक्तलाई स्याङ्जा, बाजुरा र दोलखाको विवादमा तीनै जिल्लामा पुन मतदान गर्ने निर्णय गर्नु लगाउनुले थप शंका उब्जाएको छ । आयोगले आइतबार नै दोलखाका १० मतदान केन्द्रमा मंसिर १५ भित्र पुनः मतदान गर्ने निर्णय गराएको छ ।