सशस्त्र तीन एसपीलाई मूख्यालय तानियो

१७ मंसिर, काठमाडौं । आर्थिक अनियमितताको आशंकामा सशस्त्र प्रहरी बल ‘एपीएफ’ले बारा पर्सा र नवलपरासीका तीन जना उपरीक्षक ‘एसपी’लाई मूख्यालय तानेको छ । नेपाल– भारत सीमा क्षेत्रबाट निर्वाचन अघि र निर्वाचनपछि नियमित रुपमा तस्करी गर्न सहयोग गरेको आरोपमा उनीहरुलाई छानवीनका लागि मूख्यालय तानेको स्रोतको दावी छ ।

यसरी तानिनेमा सशस्त्र प्रहरी बल मुख्यालयले १२ नम्बर गण हेडक्वार्टरका प्रमुख ‘गणपति’ राजेन्द्र थापा, १३ नम्बर गण हेडक्वार्टरका प्रमुख तेजप्रसाद पोखरेल र २६ नम्बर गण हेडक्वार्टर पश्चिम नवलपरासीका रुपकुमार क्षेत्री छन् । उनीहरु मध्ये पोखरेलचाहि आफै सरुवा मागेर आएको बताइएको छ ।

बाराका बोर्डर आउट पोस्ट ‘बीओपी’ इन्चार्जलाई पनि आन्तरिक अनुसन्धानका लागि फिर्ता बोलाइएको सशस्त्र प्रहरी स्रोतले जानकारी दियो । सशस्त्र प्रहरी मुख्यालयले एसपीद्वय टोपबहादुर डाँगी र उद्धव रावल नेतृत्वका दुई छुट्टाछुट्टै ‘मार्सल टोली’लाई तराईका विभिन्न जिल्लामा छड्केमा पठाएको थियो । सोही मार्सल टोलीको प्रतिवेदनका आधारमा सशस्त्रले बाराका एसपीलाई फिर्ता बोलाएको हो ।

सशस्त्रका बाहिनी र गणलाई समेत सुइँको नदिई हेडक्वार्टरबाट केही दिन अघिबाट एसपी नेतृत्वका दुई मार्सल टोली खटिएका थिए । सोही रिपोर्टका आधारमा मुख्यालयले शुक्रबार शंका लागेका अधिकृतहरुलाई फिर्ता हुन २४ घण्टे निर्देशन दिएको थियो । ‘ थापा र क्षेत्रीलाई काठमाडौ बोलाइएको छ तर पोखरेलचाहि आफैले सरुवा मागेको बुझिएको छ’, मूख्यालय स्रोतले भन्यो ।