सेनाको गाडी सडकबाट झण्डै डेढ सय मिटर खस्याे, घाइते १५ मध्ये २ जनाको अवस्था गम्भीर

१८ मंसिर, मोरङ । आइतबार दिउँसो पाँचथरको मिक्लाजुङ गाउँपालिका–६ स्थित राँके-रवि-भेडेटार सडकखण्डमा नेपाली सेनाको गाडी दुर्घटना हुँदा १५ जना घाइते भएका छन् । घाइतेमध्ये २ जनाको अवस्था गम्भीर रहेको प्रहरीले जनाएको छ ।

प्रदेश १ प्रहरी कार्यालय विराटनगरका अनुसार पाँचथरको मिक्लाजुङ गाउँपालिका–८ बुधबारेबाट फिदिमको रणशेर गणतर्फ जाँदै गरेको बा १ ग ३४४२ नम्बरको नेपाली सेनाको वानटन गाडी अनियन्त्रित भइ आज दिउँसो सवा १२ बजेतिर दुर्घटनामा परेको हो ।

अदलीबदली भएका सैनिक कर्मचारी चढेको गाडी सडकबाट लगभग १५० मिटर तल झरेको प्रहरीले जनाएको छ । गाडीमा १८ जना सवार थिए । तीमध्ये १५ जना घाइते भएका हुन् ।

घाइतेहरुलाई नेपाली सेनाकै हेलिकोप्टरमार्फत उद्दार गरेर उपचारका लागि बाहिर लगिएको प्रहरीले जनाएको छ । केही घाइतेको पाँचथरमै उपचार भइरहेको र गम्भीर घाइतेख सेनाकाे हेलिकाेप्टरबाट अन्यत्र लगिएकाे जनाइएकाे छ ।