‘अधिकारकर्मी’ जस्मिन ओझामाथि अज्ञात समूहद्वारा ढुंगा प्रहार

१८ मंसिर, काठमाडौं । पतिबाट भएको हिंसाबाट पीडित भनिएकी विनु यादवको मुद्दामा वकालत गरेको भन्दै जस्मिन ओझामाथि अज्ञात समूहले ढुंगा प्रहार गरेको छ । अदालतबाट न्याय नपाएको भन्दै केही दिनअघि सर्वोच्च अदालतको मुख्य द्वारमा रातो रंग छ्यापेर प्रदर्शनमा उत्रिएकी यादवले सर्वोच्चमा दायर रिट निवेदन विचाराधीन छ ।

सर्वोच्चको गेटबाट यादव तत्काल पक्राउ परिन् । उनलाई अधिकारकर्मी बताउने जस्मिन ओझाले साथ दिइरहेकी छन् । यही अवस्थाबीच विनु यादवको पक्षमा लागेको भन्दै आफूमाथि दैनिक सुरक्षा थ्रेट भइरहेको अधिकारकर्मी ओझाले बताएकी छन् । केही दिनदेखि उनको मोबाइल फोनमा अज्ञात व्यक्तिले विनु यादवको पक्षमा बोलेको भन्दै उनलाई धम्की आउने गरेको छ ।

आइतबार दिउँसो उनीमाथि भक्तपुरको बालकोटमा अज्ञात समूहले ढुंगा प्रहार गरेको छ । आफू पठाओका लागि कुरिरहेको बेला पछाडिबाट ढुंगा हानेर व्यक्ति फरार रहेको ओझाले बताइन् । ढुंगा हान्ने व्यक्ति चिन्न नसकेकाे बताइन् ।

‘म बालकोटबाट फर्कदै थिएँ । पठाओका लागि सडकमा उभिरहँदा पछाडिबाट ढुंगा प्रहार भयो । शनिबार राति एकजनाले भोलि जे पनि हुन सक्ने भन्दै धम्की दिनु र आज ढुंगा प्रहार हुनुले विनु यादवको पक्षमा आवाज उठाएकाले मलाई टार्गेट गरिएको हो,’ उनले भनिन् । आफूले जीउज्यानको सुरक्षाका लागि प्रहरीमा निवेदनसमेत दिँदा समेत सुरक्षा नपाएकाे उनले बताइन् । ओझा एमालेनिकट अनेरास्ववियु नेतृ पनि हुन् ।