एमालेभित्र समानुपातिकको किचलो : योगदान नभएकालाई सांसद बनाएकोमा आपत्ति

२७ मंसिर, काठमाडौं । एमालेले समानुपातिक सांसद छनौटको क्रममा विवादित व्यक्तिलाई सांसद बनाएको भन्दै विरोध शुरु भएको छ । संघीय संसद र प्रदेश १ मा समेत यसको विरोध भएको हो ।

निर्वाचन आयोगले प्रदेश १ मा नाम सच्याउन समय दिएको भएपनि एमालेले अटेर गरेको छ । समानुपातिक सांसद छनौटको विषयलाई लिएर तल्लो तहका नेता कार्यकर्ताले पार्टीका शीर्ष नेताहरुको आलोचना समेत गरेका छन् ।

एमालेको विवादास्पद छविका नेपाल परिवार दलका अध्यक्ष एकनाथ ढकाललाई समानुपातिक सांसद बनाएपछि विवाद उत्पन्न भएको हो । त्यसैगरी ढकाल मात्र होइन एमाले महासचिवकी बहिनी मेनका पोखरेल, रामबहादुर थापा बादलकी श्रीमती नैनकला थापा अनेरास्ववियूकी अध्यक्ष सुनिता बराललाई समानुपातिकको सूचीमा राखेकै कारण विवाद उत्पन्न भएको छ । यसैगरी सुदुरपश्चिममा पनि डा.भरत साउद लगायतका नेताहरुले एमालेविरुद्ध उजुरी गरेका छन् । यसपल्ट सुदुरपश्चिममा एमाले निकै कमजोर भएको थियो ।

यो विषयमा शीर्ष नेताहरूले आन्तरिक रूपमा र तल्ला तहका नेता तथा कार्यकर्ताले खुलेरै नेतृत्वको आलोचना मात्रै गरेका छैनन । उनीहरुले जनतालाई जवाफ दिनुपर्ने हरेक नेताहरुलाई प्रश्न गरेका छन् । धेरै जसो कार्यकर्ताहरुले सामाजिक सञ्जालमा प्रश्न गरेका हुन् ।

एमाले अध्यक्ष केपी ओलीकै रुचिमा एकनाथ ढकाल सांसद सिफारिस भएकाले पार्टीका शीर्ष नेताहरूले खुलेर आलोचना गरेका छैनन । तर उनीहरु सन्तुष्ट भने छैनन । ढकाललाई संसद् प्रवेश नगराउन खस–आर्यबाट एकजना मात्रै पुरुष पठाएर बाँकी नौजना महिला पठाउनुपर्ने हुन्थ्यो । तर, नेतृत्वले जसरी पनि सांसद बनाउने गरी सूचीमा राखेकाले ढकाल परेको बताइएको छ । लामो समयसम्म पार्टीलाई योगदान गरेका व्यक्तिहरु घाम तापेर बस्नुपर्ने र अवसरलाई बाहिरबाट आएका व्यक्तिहरुले पाउन थालेपछि एमालेभित्र विवादको आगो सल्किएको छ ।

एमाले पूर्वउपाध्यक्ष भीम रावलले जापान सरकारको समेत छानबिनमा परेको होली वाइनको झोली भर्ने तरिका भन्दै सामाजिक सञ्जालमा असन्तुष्टि पोखेका छन् । उनले एउटा दलको अध्यक्ष र अर्को दलको समानुपातिक प्रणालीबाट सांसद बन्नुलाई राजनीतिमा नैतिकताको खडेरी भनी टिप्पणी गरेका छन् ।

‘अमेरिकामा कर छलीको आरोपमा दुई वर्ष र कोरियामा जासुसीको आरोपमा तीन वर्ष काराबासको सजाय भोगेका सन मुनद्वारा स्थापित विवादास्पद युनिफिकेसन चर्च आबद्ध होलीवाइन भनी चर्चित नेपाल परिवार दलका अध्यक्ष एकनाथ ढकाललाई एमालेले समानुपातिकबाट प्रतिनिधिसभाको सदस्य बनाएको छ ।

परिवारले ढकालको हस्ताक्षरबाट चुनावमा उम्मेदवार पनि उठाएको छ । एकसाथ एउटा दलको अध्यक्ष र अर्को दलको समानुपातिक प्रणालीबाट प्रतिनिधिसभाको सदस्य, क्या चमत्कार ! राजनीतिमा नैतिकताको खडेरी ! स्मरणीय छ, ढकालको विवाह पनि विदेशी महिलासँग भएको छ,’ रावलले ट्विटमा भनेका छन् । एमालेका धेरै नेता कार्यकर्ताहरुले एकनाथ ढकाल सांसद बन्नुको कारण मागेका छन् । पार्टी अध्यक्ष केपी शर्मा ओली, पार्टीका उपाध्यक्षहरु सचिवहरु र अन्य शीर्ष नेताहरुलाई त्यसबारे प्रश्न गरेका छन् । बन्दसूचीमा ढकालको नाम खस–आर्य क्लस्टरबाट दोस्रो नम्बरमा थियो ।

गत वर्ष भएको परिवार दलको तेस्रो महाधिवेशनबाट तेस्रो कार्यकालका लागि ढकाल निर्वाचित भएका थिए । यसअघि उनी परिवार दलबाट संविधानसभा सदस्य भएका थिए । ढकालले स्थापना गरेको युनिभर्सल पिस फेडेरेसनले सन् २०१८ मा आयोजना गरेको एसिया प्यासिफिक समिटमा ओली नेतृत्वको सरकारले राज्य कोषबाट चार करोड रुपैयाँ खर्च गरेको थियो । सो सम्मेलनका क्रममा विदेशबाट आएका विशिष्ट अतिथिहरूलाई स्वागत र भेटवार्ताका लागि भन्दै ओलीले कूटनीतिक मर्यादाविपरीत हायात होटेलमै चार दिन बिताएको भन्दै आलोचना भएको थियो ।

त्यसैगरी महासचिव शंकर पोखरेलकी बहिनी मेनका पोखरेलको बारेमा पनि प्रश्न गरिएको छ । यसअघिको कार्यकालमा आफू लुम्बिनी प्रदेशको मूखयमन्त्री, श्रीमती सुजिता शाक्य समानुपातिकको सांसद थिए । अहिले आफू पार्टीको महासचिव भएपछि पार्टीभित्रका अन्य नेता कार्यकर्ताहरुलाई उछिन्दै महिलातर्फ खस आर्य कोटको १ नम्बरमा मेनकालाई राखिएको थियो । जसले गर्दा उनी निश्चित सांसद हुने भएकी थिइन । उनको पार्टीभित्र कुनै पनि योगदान नभएको भन्दै एमाले नेता कार्यकर्ताहरुले शंकर पोखरेलमाथि प्रश्न गरेका छन् । यसैगरी बादल पत्नी थापालाई पनि अवसर मात्रै दिएको भन्दै आलोचना गरिएको छ ।

बादल समानुपातिकका बस्न नमानेपछि उनकी श्रीमतीलाई सांसद बनाइएको र माओवादीबाट आएका अन्य नेताहरुलाई वेवास्था गरिएको भन्दै आलोचना गरिएको छ । अनेरास्ववियूकी अध्यक्ष बराललाई केन्द्रीय सदस्य बनाइएको तथा समानुपातिकबाट पनि सांसद बनाइएको भन्दै आलोचना गरिएको छ । उनकै समकालीन मेनका पछाईले लामो स्टाटस लेख्दै असन्तुष्टि जनाएकी हुन । ‘समकालीन कसैलाई अवसरमाथि अवसर दिने,कसैलाई भुईँबाट उठ्न नदिने,मलाई तीनपटक सूचीमा राखेर उपकार गर्ने हाम्रा नेतालाई धेरै धन्यवाद । यसले गर्दा मलाई झन् परिपक्व बनाएको छ’, पछाईले भनेकी छिन् ।

उनका समकालीनमध्ये सुनिता बराल र दीपा शर्मा समानुपातिक सांसद बनेका छन् । यद्यपि उनका धेरै समकालीन समानुपातिक सूचीमै पर्न पाएका छैनन् । तर मेनकाले आफू नपरेकोमा भन्दा पनि आफ्ना समकालीनलाई अवसरको खात दिएर आफूहरूलाई भुईँमाथि उठ्न नदिएकोमा चित्त दुखाएकी हुन् । त्यसो त अनेरास्ववियुका पूर्व अध्यक्षहरू रुपनारायण श्रेष्ठ, माधव ढुंगेल, किशोरविक्रम मल्लले अहिलेसम्म चुनाव लड्ने टिकट समेत पाएका छैनन् भने सुनिता बरालसँगै उपाध्यक्ष भएका तर राजनीतिमा सिनियर रश्मी आचार्य भुईँमै लडिरहेका छन् ।

झापाकी सुनिताको राजनीतिमा एकपछि अर्को छलाङ देखेर एमालेका शीर्ष नेताहरू समेत चकित छन् । एमालेबाट सुनिता बराललाई सांसद बनाउनका लागि अन्य क्लस्टरमा कैँची चलाइएको टिप्पणी समेत भएको छ । खस आर्यबाट महिलामा ६ नम्बरसम्मका मात्र पर्ने भएपछि ८ नम्बरकी सुनितालाई सांसद बनाउने क्रममा ७ नम्बरकी दीपा शर्माले समेत मौका पाएको भन्दै एमालेभित्र विवाद शुरु भएको छ । शार्मा राष्ट्रपति कार्यालयमा कार्यरत छिन भने सुनिता केपी ओलीको जिल्ला झापाकी हुन् ।