गृहमन्त्री पार्टीले हैन, प्रधानमन्त्रीले बनाउने होः उपाध्यक्ष महरा

१६ माघ, काठमाडौं । नेकपा माओवादी केन्द्रका उपाध्यक्ष कृष्णबहादुर महराले गृहमन्त्रीबारे पार्टीलाई चासो नभएको बताएका छन् । उनले गृहमन्त्रीबारे पार्ठीको बैठकमा कुनै पनि कुरा नउठेको भन्दै गृहमन्त्री कसलाई बनाउने भन्ने कुराको टुंगो लगाउने जिम्मेवारी प्रधानमन्त्रीको भएको बताएका छन् ।

सोमबार पार्टी पदाधिकारी बैठकपछि सञ्चारकर्मीहरुसँग नेता महराले गृहमन्त्री कसलाई बनाउने भन्ने काम पार्टीको नभएको बताए । उनले प्रधानमन्त्री पुष्पकमल दाहाल प्रचण्डले नै यसबारे निर्णय गर्ने भएकाले उक्त विषयलाई पार्टीभित्र प्रवेश नै नगराइएको जिकीर गरे ।

उनले भने, ‘गृहमन्त्रीको विषय बैठकमा प्रवेश भएन । यहाँ निर्णय गर्ने कुरा पनि होइन त्यसैले प्रवेश नै गरिएन । यो सरकारको विषय हो । गृहमन्त्री को हुन्छ, को हुन्न भन्ने कुरा उनले टुंगो लगाउने कुरा हो । यो पार्टीले टुंग्याउने कुरा होइन । प्रधानमन्त्रीले राय माग्नु भयो भने स्थायी कमिटीमा त्यो विषयमा पर्सि छलफल होला ।’

गत शुक्रबार सर्वोच्च अदालतको आदेशसँगै राष्ट्रिय स्वतन्त्र पार्टीका सभापति रवि लामिछानेले उपप्रधान तथा गृहमन्त्रीको पद गुमाएका छन् । तर पछिल्लो समय गृह मन्त्रालय प्रधानमन्त्री दाहालकै मातहतमा राखिएको छ ।

यद्यपि राष्ट्रिय स्वतन्त्र पार्टीले गृह मन्त्रालय आफै्नै लागि हुनुपर्ने अडान राख्दै आएको छ । राष्ट्रिय स्वतन्त्र पार्टीका प्रवक्ता मुकुल ढकालले यसअघि पत्रकारहरूसँग कुरा गर्दै गृह मन्त्रालय रास्वपाले पहिले नै पाइसकेकाले यसमा फेरि दाबी गरिरहन आवश्यक नरहेको बताएका थिए ।