मापसे चेकिङमा बसेका प्रहरी हवल्दारको हात भाँच्ने चालक धरौटीमा रिहा

१७ माघ, पोखरा । मापसे चेकिङमा बसेका प्रहरीलाई ठक्कर दिएर फरारपछि पक्राउ परेका गाडी चालक धरौटीमा रिहा भएका छन् ।

गत बिहीबार राति २ बजेतिर रामबजारस्थित भारतीय पेन्सन क्याम्प अगाडि मापसे चेकिङमा खटिएका प्रहरी हवल्दार चित्रबहादुर वलीले मापसे गरेर गाडी चलाएका सौरभ थापालाई रोक्ने क्रममा ठक्कर वलीको हात भाँचिदिएका थिए ।

ठक्कर दिएर फरार भएका उनलाई खोजी गरी पक्राउ गरी जिल्ला अदालतबाट म्याद लिई अनुसन्धानमा राख्दै आएकामा सोमबार उनलाई जिल्ला प्रशासनले धरौटीमा रिहा गरेको हो । थापालाई अभद्र व्यवहार कसुरमा मुद्दा चलाइएको थियो । जसमा २८ सय रुपैयाँ धरौटीमा छाेडेका थिए ।

थापा कार व्यापारीहरुको संस्था नाडाका अध्यक्ष ध्रुव थापाका पुत्र हुन् । उनलाई ‘पावर’कै दबाब कमजोर अभियोग लगाइएको हो । यसअघि पनि थापाले मापसे गरेर गाडी चलाउँदा विभिन्न स्थानमा गाडीलाई ठोक्काउँदै क्षति पुर्याएका थिए ।

हात भाँच्चिएका घटनामा कमजोर कसुर अभियोजन गरेको भन्दै आलोचना भइरहेको छ ।