प्रदेश १ को नामाकरणबारे मुख्यमन्त्रीसँग प्रधानमन्त्रीकाे चासो

१८ माघ, विराटनगर । प्रधानमन्त्री पुष्पकमल दाहाल ‘प्रचण्ड’ले प्रदेश १ को नामाकरणबारे चासो राखेका छन् । बुधबार बिहान प्रधानमन्त्री प्रचण्डलाई भेट्न पुगेका प्रदेश १ का मुख्यमन्त्री हिक्मतकुमार कार्कीसँग चासो राखेका हुन् ।

६ वटा प्रदेशको नाम टुंगो लागिसकेको उल्लेख गर्दै प्रम प्रचण्डले नाम छिट्टै टुंग्याउनेबारे कार्यक्रम बनाउन सुझाएका थिए । भेटमा सरकारको काम र विकास्निर्माणबारे छलफल भएको कार्कीले बताए । प्रदेशको विकास र समृद्धिबारे प्रधानमन्त्रीले गम्भीरतापूर्वक चासो लिएको उनले बताए ।

प्रधानमन्त्रीले प्रदेशलाई मजबुत बनाउन शिक्षा, निजामती र प्रहरी ऐन चाँडै ल्याउने आश्वासन दिएको उनको भनाइ छ । चाँडै नाम राख्ने प्रक्रिया अघि बढाउने जानकारी गराएको उनले बताए ।

कार्की प्रचण्ड नेतृत्वकाे माओवादी केन्द्रकाे समर्थनमा एमालेबाट मुख्यमन्त्री बनेका थिए ।