बैंकिङ घोटालामा कामना सेवा विकास बैंकका सीईओ बस्नेतसहित चार जना पक्राउ

१८ माघ, काठमाडौं । कमसल धितोमा अधिक कर्जा प्रवाह गरेको अभियोगमा कामना सेवा विकास बैंकका सीईओसहित चार जनालाई आज प्रहरीले पक्राउ गरेको छ ।

कामना सेवा विकास बैंकमा भएको करोडौंको कर्जा अपचलनमा बैंकका सीईओ प्रवीन बस्नेतसहित दुई दर्जन बढी उच्च तहका कर्मचारीको संलग्नता रहेको बारेमा नेपालबहस लगायतका विभिन्न सञ्चारमाध्यामले समाचार प्रकाशित गरेपछि नेपाल राष्ट्र बैंकको ध्यानाकर्षण भई विशेष स्थलगत निरीक्षण गर्दा ठूलो कैफियत भेटिएको थियो ।

राष्ट्र बैंकको अनुसन्धानमा सीईओसहितका कर्मचारीहरुको मिलेमतोमा प्रदेश १ को झापा लगायतका स्थानको कमसल जग्गा धितो राखी अधिक मूल्या«कन गराई कर्जा प्रवाह गरेको भेटिएको थियो । गत महिना राष्ट्र बैंकले नेपाल प्रहरीको केन्द्रीय अनुसन्धान व्यूरो (सीआईबी) लाई थप अनुसन्धान गरी कारवाही गर्न पत्र पठाएपछि सीआईबीले लामो अनुसन्धानपछि ईलाका प्रहरी कार्यालय दमकलाई प्रक्राउ गरी आवश्यक कारवाही गर्न पत्र पठाएको थियो ।

ईप्रका दमकले सोही प्रकरणमा २२ जना भन्दा बढीलाई पक्राउ पुर्जी जारी गरी खोजतलास गरिरहेकोमा आज चार जनालाई पक्राउ गर्न सफल भएको हो । पक्राउ पर्नेमा बैंकका निर्वतमान सीईओ प्रवीन बस्नेतसहित वीरेन्द्र सिंह भण्डारी, हरेन्द्र दाहाल, चन्द्रबहादुर थापा रहेका छन् । हरेन्द्र दाहाल र चन्द्रबहादुर थापा ऋणी हुन्।

कामना सेवा विकास बैंकको दमकस्थित शाखाबाट कम धितो राखी बढी ऋण प्रवाह गरेको आरोपमा प्रहरीले पक्राउ गरेको हो। प्रहरीले जिल्ला अदालत झापाबाट म्याद थप गरी बैंकिङ कसुर मुद्दामा अनुसन्धान गरिरहेको छ।

र याे पनि…… कामना सेवा विकास बैंकमा करोडौंको घोटालाः सीईओ बस्नेतसहित दर्जनौं कर्मचारीबिरुद्ध पक्राउ पुर्जी जारी