गृहराज्यमन्त्री दिएपनि कांग्रेस सरकारमा आउन तयार छः ओली

१९ माघ, विराटनगर । नेकपा एमाले अध्यक्ष केपी शर्मा ओलीले सत्ता मोहले नेपाली कांग्रेस संस्कारविहीन भएर सरकारमा सहभागि हुन लालायीत भइरहेको ओरोप लगाएका छन् । ओलीले कांग्रेसलाई गृहराज्यमन्त्री दिएपनि सरकारमा सहभागि हुने बताएका छन् । वर्तमान सरकारको समीकरणमा विवाद आउनुको मूख्य कारण कांग्रेस भएकोप्रति लक्षित गर्दै आफ्नो हैसियत विर्सिएर राज्यमन्त्री माग्ने अवस्थामा कांग्रेस आइपुगेको ओलीको टिप्पणी छ ।

विराटनगर विमानस्थलमा बिहीबार पत्रकारसँग कुराकानी गर्दै ओलीले कांग्रेसमा राजनीतिक संस्कार नभएको आरोप लगाउँदै अहिले गृह राज्यमन्त्री दिँदा पनि कांग्रेस सरकार आउन तयार रहेको बताएका हुन् । उनले अहिले देखिएका विवादकै कारण वर्तमान सरकार संकटमा नपर्ने बताए । केहीले सरकार तत्काल संकटमा जाओस भन्ने चाहिको भएपनि आफूलाई संकटमा जाला जस्तो नलागेको उनको भनाइ छ । राष्ट्रपति निर्वाचन र गृहमन्त्री चयनको विषयले सत्ता साझेदार दलहरुबीच खटपट परिरहेका बेला ओलीले यस्तो बताएका हुन् ।

उनले नेपालको शासन प्रणालीमै अस्थिरता रहेका कारण प्रजातन्त्र प्राप्तिपछिका सरकार पूर्ण कार्यकाल नचलेको बताए । राष्ट्रपति निर्वाचनको सन्दर्भमा माओवादी कांग्रेसतिर ढल्किएको भनेर राखिएको जिज्ञासामा ओलीले माओवादीका केही नेताहरुले त्यसरी बोले पनि आफूलाई त्यस्तो नलागेको बताए । ओलीले कांग्रेसले राष्ट्रपतिको उम्मेदवार हुन्छु भन्नु अनौठो कुरा नभएको तर उसले राजनीतिक संस्कार र इस्तर नराखेको टिप्पणी गरे । उनले कांग्रेससँग माग्नेमात्र हैसियत रहेको दावी गरे ।

अध्यक्ष ओलीले गृहमन्त्री नियुक्तिको विषयमा सर्वोच्च अदालतको मानहानी हुने गरी आफ्नो भनाई पनि राखेका छन् । उनले सर्वोच्च अदालतको पूर्णपाठ कुरेर पुर्वसहमति अनुसार राष्ट्रिय स्वतन्त्र पार्टी (रास्वपा) लाई प्रधानमन्त्री पुष्पकमल दाहाल प्रचण्डले गृह मन्त्रालय दिन आनाकानी गर्नु गलत भएको बताए । ओलील अदालतका जुनसुकै निर्णय कुर्न आवश्यक नभएको बताए ।

उनले भने, ‘अदालतको पूर्णपाठ कण्ड गर्न आवश्यक छैन् । हामीले गृह मन्त्रालय रास्वपालाई दिएको हो । अदालतको पूर्णपाठ किन चाहियो ? कण्ठ गर्नलाई हो ? । पूर्वसहमति अनुसार गृहमन्त्री राष्ट्रिय स्वतन्त्र पार्टीबाटै हुने उनले बताए । उनले पूर्वसहमति अनुसार रास्वपालाई गृहमन्त्री नदिएर सरकारमा विवाद आउनु स्वभाविक भएको बताए ।

अध्यक्ष ओलीले रास्वपाले कसलाई गृहमन्त्रीमा पठाउँछ त्यो त्यही पार्टीको काम भएको र रवि लामिछानेलाई नै गृहमन्त्रीमा पठाउँछ भने अरूले टाउको दुखाइरहन आवश्यक नभएको भन्दै प्रधानमन्त्रीलाई बानिपरेकाले अदालतको पूर्णपाठ चाहिएको हुनसक्ने बताए । पूर्वसहमति अनुसार नै राष्ट्रपतिको उम्मेदवार सत्तापक्षको एमालेबाटै हुने उनको दावी छ । उनले कांग्रेसमा राजनीतिक संस्कार नभएको आरोप लगाउँदै अहिले गृह राज्यमन्त्री दिँदा पनि कांग्रेस सरकार आउने तयार रहेको बताए ।