आर्थिक मन्दीले नागरिक चपेटामा : सांसद भोजराज अर्याल

१९ माघ, स्याङ्जा । गण्डकी प्रदेशका सांसद भोजराज अर्यालले आर्थिक मन्दीले नागरिकहरु चपेटामा परेको बताएका छन् । गण्डकी प्रदेशको बिहीबार बसेको बैठकमा बिशेष समय लिएर बोल्दै सांसद अर्यालले आर्थिक मन्दीको असर निम्न वर्गीय र मध्यम वर्गीय नागरिकमा परेको बताएका हुन् ।

वित्तीय संस्थाहरुले ब्याजदरमा गरेको मनपरीले धेरै उद्योगी व्यवसायी देखि सर्वसाधारण मर्कामा परेको बारेमा गण्डकी प्रदेश सरकारको ध्यानाकर्षण सांसद अर्यालले गराए । वर्तमान परिपेक्षमा जनतालाई परेको समसामायिक समस्याका बिषयमा बोल्दै सांसद अर्यालले मुल्यबृद्धि, बजेट घाटा र आन्तरिक उत्पादन घटेको बिषयमा ध्यानाकर्षण गराएका थिए ।

स्याङ्जा निर्वाचन क्षेत्र २ को २ बाट निर्वाचित सांसद अर्यालले जनताको भावना सँगै मुहार फेरिने ठोस कार्ययोजना सरकारले ल्याउनुपर्ने बताए । आन्तरिक उत्पादन घट्नु र आयात बढ्नुले देशलाई ठुलो क्षती पुगेको सांसद अर्यालले बताए । जनताको नजिकको सरकार भनेको प्रदेश सरकार हो भन्ने पुष्टि गर्ने अवसर आएको भन्दै सांसद अर्यालले यसको औचित्यतर्फ ख्याल दिन प्रदेश सरकारलाई अनुरोध गरे ।