जिल्लामै ठूलाे पुरस्कार राशीकाे वक्तृत्वकला प्रतियोगिता, पाण्डेले जिते ५० हजार

१९ माघ, लमजुङ । लमजुङको मध्यनेपाल नगरपालिका–१० को नेटास्थित गणेश मालिका माध्यमिक विद्यालयले जिल्लामै सबैभन्दा ठूलो धनराशीको पुरस्कार व्यवस्था गरी वक्तृत्वकला प्रतियोगिता आयोजना गरेको छ ।

विद्यालयको वार्षिकोत्सवको अवसरमा आयोजित जिल्लास्तरीय वक्तृत्वकला प्रतियोगिताको ५० हजार रुपैयाँ राशीको पुरस्कार आदर्श बाल माद्यामिक विद्यालयका सन्देश पाण्डेले हात पारेका छन् ।

विद्यालयको ४४औं वार्षिकोत्सवको अवसरमा आयोजित वक्तृत्वकला प्रतियोगितामा पाण्डेले जिल्लाभरका २१ प्रतियोगिलाई पछि पार्दै सो पुरस्कार जितेका हुन् ।

विद्याज्योति माध्यमिक विद्यालयकी सलिना मजाकोटीले द्वितीय स्थान प्राप्त गरी ३० हजार रुपैयाँ जितिन भने आयोजक गणेश मालिका माद्यामिक विद्यालयकी कृतिका दुराले तृतीय स्थान प्राप्त गरी २० हजार रुपैयाँ पाइन भने सान्त्वना हुने सरस्वती माध्यमिक विद्यालयकी सोफिया विकले १० हजार पुरस्कार प्राप्त गरिन् ।

प्रतियोगिताको मूल्यांकन गर्न पिएन क्याम्पस पोखराबाट प्राध्यापकहरु ल्याइएको थियो । प्रतियोगितामा थइन्टरनेट बरदान कि अभिशाप’ र ‘वैदेशिक रोजगारभन्दा स्वरोजगार नै ठिक’ भन्ने दुई शिर्षक दिइएको थियो ।

विद्यालयका प्रधानाध्यापक चन्द्रबहादुर बस्नेतकाअनुसार नेटा घर भई हाल काठमाडौं बस्ने सूर्यबहादुर गुरुङ र खेमबहादुर गुरुङले आफ्ना स्व. बाबुआमा मानबहादुर र मैत कुमारीको सम्झनामा १० वर्षसम्मको लागि रनिङ शिल्डसहित वक्तृत्वकला प्रतियोगिता आयोजना गर्ने गरी पुरस्कारको व्यवस्था गरेका हुन् ।