फागुनभित्र मोटरसाइकलको कर बुझाउनेलाई ५ वर्षको जरिवाना छुट

२६ माघ, काठमाडाैं । आगामी फागुन महिनाभित्र मोटरसाइकलको कर तथा नवीकरण शुल्क भुक्तानी गर्दा ५ वर्षसम्मको जरिवाना छुट हुने भएको छ ।

कार्यालयले बिहीबार एक दैनिकमा सूचना प्रकाशन गरेर आफ्नो नामको सवारीसाधनको समयमै नवीकरण गरी कर भुक्तानी गर्न सबैलाई आग्रह गरेको छ ।

यातायात व्यवस्था कार्यालय काठमाडौंले बिहीबार एक सार्वजनिक सूचना जारी गर्दै जरिवाना छुट दिने जनाएको हो । आर्थिक वर्ष २०७०/७१ देखि २०७५/७६ सम्म नवीकरण नभएका सवारीधनीले २०७९ फागुन मसान्तभित्र कर बुझाएमा सो अवधिको जरिवाना छुट गरिने कार्यालयले जनाएको छ ।

ट्राफिक कारबाहीमा परी सवारीसाधन नियन्त्रणमा रहेकाहरुलाई पनि अविलम्व कर भुक्तानी गरी जरिवाना छुटको लाभ लिन कार्यालयले आग्रह गरेको छ ।

‘सवारीसाधन कर नवीकरण शुल्क र दण्ड जरिवानाको रकमबाट कुनै पनि वहानामा उन्मुक्ति नमिल्ने भएकाले समयमा नै सवारीसाधनको कर तथा बक्यौता रकम भुक्तानी गर्नुहुन अनुरोध गरिन्छ’ सूचनामा उल्लेख छ ।

कर नबुझाए कर भुक्तानी नगरेकाको लगत संकलन गरी जरिवाना रकम सरकारी वक्यौतासरह असुल उपर गर्न स्थानीय तहसँग समन्वय गरी कारबाही प्रक्रिया अगाडि बढाइने तयारी भइरहेको कार्यालयले जनाएको छ ।