बैंकले फागुनमा निक्षेपको ब्याजदर परिवर्तन नगर्ने

२६ माघ, काठमाडौं । फागुन महिनामा बैंकहरुले निक्षेपको ब्याजदर परिवर्तन नगर्ने निर्णय गरेका छन् । बिहीबार बिहान बसेको नेपाल बैंकर्स संघको बैठकले फागुनमा निक्षेपको ब्याजदर परिवर्तन नगर्ने निर्णय गरेको हो ।

कर्जाको लागत बढेको, ब्याज बढाएर पनि निक्षेपमा सुधार नभएको भन्दै माघमा वाणिज्य बैंकहरूले ब्याजदर घटाएर ११ प्रतिशत कायम गरेका थिए ।

पछिल्लो समय रेमिटेन्समा सुधार भएको र आयातमा कमी आएपछि बाह्य क्षेत्र सन्तुलनमा आइरहेको बैंकहरुको दाबी छ ।

तर, मौद्रिक नीति सार्वजनिक गर्न लागेको राष्ट्र बैंकले नीतिगत ब्याजदरहरू चलाएमा ब्याजदरमा परिवर्तन गर्ने गरी बैंकर्सहरूबीच शुक्रबार सहमति भएको थियो ।

आयात घट्ने र रेमिटेन्स बढने भएमा बजारले नै ब्याजदर घटाउने अनुमान राष्ट्र बैंकको छ । पुसमा कर्जाको ब्याजदर नघटाएका बैंकहरूले माघमा निक्षेपको ब्याजदर घटाएका थिए ।